دوای ھاتنی حەشدی شەعبی بۆ ناوچە کوردستانییەکانی دەرەوەی ئیدارەی ھەرێمی کوردستان و داگیرکردنی ئەو ناوچانە بە زەبری ھێز و ئەنجامدانی چەندین تاوانی مرۆیی، دەیان ھەزار قوتابی و ماموستا ئاوارەی ھەرێمی کوردستان بوونە، وەزارەتی پەروەردەی حکوومەتی ھەرێمی کورستانیش دەرگای قوتابخانەکانی ھەرێمی بە ڕووی ئاوارەکاندا کردووەتەوە، بۆ ئەوەی قوتابییە ئاوارەکان لە خوێندنی ئەمساڵ بێبەش نەبن.

سەرۆکی یەکێتیی ماموستایانی کوردستان، (ئەحمەد گەرمیانی) بە ماڵپەڕی فەرمیی پارتی دیموکراتی کوردستانی ڕاگەیاند: ''دوای ھاتنی حەشدی شەعبی بە ھاوکاریی سوپای پاسدارنی ئێران بۆ ناوچە کوردستانییەکانی دەرەوەی ئیدارەی ھەرێمی کوردستان لە کەرکووک لە کۆی ١٠٦ ھەزار قوتابی و ھەشت ھەزار مامۆستا بە ڕێژەی ٣٠%ی ئەوانە ئاوارەی ھەرێمی کوردستان بوونە و لە قەزای دووزخورماتووش ٢ ھەزار و ٢٨٢ قوتابی و ١٦٣ مامۆستا و لە مەخمووریش ٩ھەزار قوتابی و ھەزار و١٠٠ مامۆستا ئاوارەی ھەرێمی کورستان بوونە و لە خوێندن دابڕاون.''

سەبارەت بە دەشتی نەینەوا، (ئەحمەد گەرمیانی) گوتی: ''لە سنووری دەشتی نەینەوا بە ھۆی ھاتنی حەشدی شەعبییەوە بۆ ئەو ناوچانە، ٢٥ ھەزار قوتابی و ٣ ھەزار و٣٠٠ مامۆستا لە ناوچەکانی زوممار و شنگال و باشیک و بەرتللە و حەمدانیە ئاوارەی ھەرێمی کوردستان بوونە.''

بەڕێوبەری ڕاگەیاندنی وەزارەتی پەروەردەی حکوومەتی ھەرێمی کوردستان (شۆڕش غەفووری) بە ماڵپەڕی فەرمیی پارتی دیموکراتی کوردستانی ڕاگەیاند: ''لە ناوچە کوردستانییەکانی دەرەوەی ئیدارەی ھەرێم نزیکەی ١٥٠ ھەزار قوتابی ھەیە و نزیکەی٨٠%یان ئاوارە بوونە، بەڵام وەزارەتی پەروەردە بڕیاری داوە، ھەر قوتابییەک لە ھەر ناوچەیەکەوە ئاوارە بووە، دەتوانێت لەو ناوچەیە لە نزیکترین قوتابخانە درێژە بە خوێندنی خۆی بدات و بێبەش نەبێت لە خوێندن، بۆیە دەرگای قوتابخانەکان بە ڕووی قوتابییانی ئاوارەدا کراوەن.''
kdp-