به‌رپرسێ لیژنا ره‌وشه‌نبیرى ده‌سته‌یا بلند بنگه‌هێ لالش دیاركر كو په‌رله‌مانێ عێراقێ ب رێكا راستڤه‌كرنا یاسایا بارێ كه‌سایه‌تی یا كارپێكری ژماره‌ هه‌شتێ وهه‌شت یا سالا 1959 هه‌ره‌شه‌ى ل پێگهاتێن ئاینى ونه‌ته‌وه‌یێ ل عێراقى دكه‌ت.



شه‌مۆ قاسم، به‌رپرسێ لیژنا ره‌وشه‌نبیرى ده‌سته‌یا بلند بنگه‌هێ لالش بۆ(باسنیوز)دیاركر: "ئه‌ڤ راستڤه‌كرنا نوو سه‌پاندنا یاسایێن ئیسلامێ یه‌ ب زۆری لسه‌ر كه‌مینه‌یێن ئایینی یێن دی و ل ده‌مێ ئێك ژ دایك وبابا ژ كه‌مینه‌یه‌كێ ئاینى خوه‌ بگوهۆرت هه‌موو سامان دبته‌ پشكا وی كه‌سێ ئاینى خوه‌ گوهارتى وهه‌موو ئه‌ندامێن خێزانێ بێ به‌هر دبن ژ میراتگری ئه‌ڤ راستڤه‌كرنا په‌یره‌وكرنا رێكخراوا داعشێ یه‌ و سه‌رپێچیه‌كا ده‌ستووری یه‌ و تێكدانا بنه‌مایێ جووداكرنا دناڤبه‌را ئایین و ده‌وله‌تێ دا و ژناڤبرنا پێكڤه‌گرێدانا جڤاكی یه‌".



خۆیا ژى كر:" راستڤه‌كرنێن په‌رله‌مانێ عێراقى جهێ نیگه‌رانییا كێمینه‌یایێن عێراقى دایه‌ دخوازێن رێكخراوێن جڤاكێ سڤێل و رێكخراوێن سه‌رب نه‌ته‌وه‌یێن ئێكگرتی یێن داكۆكیێ ل مافێ مرۆڤی دكه‌ن فشارێ ل په‌رله‌مانێ عێراقێ بكه‌ن ژبۆ دووباره‌ لێزڤرینێ لسه‌ر ڤێ بریارێن نه‌ دروست".
bas news-