شارەزا دبوارێ سیاسى و لەشکەریدا راگەهاند، وەلاتێن زێلهێز سەرەدەریێ دگەل پێشمەرگەیى برێگا وەزارەتا بەرگیریا عیراقێ و وەزارەتا پێشمەرگە دکەن، بەلگە ژى بۆ هندێ جەککرن و راهێنانکرنا پێشمەرگە ژلایێ وەلاتێن جیهانیڤە، واتە پێشمەرگەیى شەرعیەتا خۆ ل بەغدا و هەولێر هەیە.

پێشمەرگە، لەشکەرەکێ ئاشتیخوازە نەک شەرخوازە و بیروباوەرێن وى بتنێ پاراستنا ئاخا کوردستانێ و سەرەوەریا وێ یە، (زەید رێکانى)، موقەدم روکن دناڤ هێزێن لەشکەریدا سەر ب وەزارەتا پێشمەرگەڤە، بۆ مالپەرێ فەرمیێ پارتى دیموکراتى کوردستان گۆت:" ئەگەر ل دیرۆکا پێشمەرگەیى ڤەگەرین دێ زانینن پێشمەرگەیى چ جارا هێرش نەکریە، بەلکو بەرەڤانى ژئاخا خو کریە و چ کارێن تیرۆرستى ژى ئەنجام نەداینە، دیسان وەلاتێن زێلهێز سەرەدەریێ دگەل پێشمەرگەیى برێگا وەزارەتا بەرگیریا عیراقێ دکەن، پێشمەرگە دئێتە راهێنانکرن و جەککرن ژلایێ ئەمریکا و ئەلمانیا و هولەندا و سوید.... هتد، واتە پێشمەرگەیى شەرعیەتا خۆ ل بەغدا و هەولێر هەیە".

(زەید رێکانى)، دیارکر:" تا نوکە ئێک وەلات دانپێدان ب حەشدا شەعبى نەکریە، هەر چەندە لگۆر دستورێ عیراقێ هاتیە پەسەندکر ب هزرەکا تائیفى نەک ب هزرەکا نیشتمانى، دیسان پێشمەرگەیى لسالا 2003ێ، شەر دژى تیرۆرستێن قاعیدە ل بەغدا و ئەنبار و مووسل کریە، کۆ لوى دەمى عیراقێ چ سوپا نەبوون تا نوکە ژى زێرەڤانێن سەرکردەیێن عەرەب ل عیراقێ پێشمەرگە بوو، جونکى عەرەبا باوەرى ب ئێک و دوو نەبوو".

موقەدم روکن دناڤ هێزێن لەشکەریدا سەر ب وەزارەتا پێشمەرگەڤە خویاکر:" جونکى پێشمەرگەیێ ئاشتیخوازە و هەمى دەولەت دزانن چ جارا نابیتە مەترسى لسەر وان، ژبەر هندێ کەس خو لێ ناکەتە خودان، ئەگەر پەرژەوەندیێن وان نەخازن، ژبەر هندێ دەمێ ئەلمانیا و ئەمریکا جەکددا پێشمەرگەیى، ب هیچ رەنگەکى عیراقێ دژایەتیا ڤێ چەندێ نەدکر، لێ پشتى پەیوەندیێن هەولێر و بەغدا تێکچووین ژنوو دبێژیت ئەڤ جەکە نەیێ شەرعییە".

بەندا (121) خالا (5) ژدستورێ عیراقێ دیارکریە، حکومەتا هەرێما کوردستانێ مافێ دامەزراندنا هێزێن نافخۆ وەک ئاسایش و زێرەڤانێن هەرێمێ هەیە.

(بەدرخان زاویتەیى)، یاساناس و چاڤدێرێ سیاسى بەحسکر:" پێشمەرگە لگور دستورى یێ هاتیە پێناسەکرن ب زێرەڤانێن سنورى یێن هەرێما کوردستانێ، پێشمەرگە ژى یێ بەرەڤانیێ ژ سنورێ خۆ دکەت، دیسان وەزراتا پێشمەرگە سەر ب حکومەتا هەرێمێ ڤەیە و یاسایەکا رێکخستى هەیە، واتە پێشمەرگە لەشکەرەکێ نیزامى و دستورییە، مەزنترین بەلگە ژى جەککرن و هنارتنا پێشمەرگەیى بۆ پشکداریکرنێ دخولێن لەشکەریدا ل وەلاتێن زیلهێز".

(بەدرخان زاویتەیى)، زەلالکر:" حکومەتا عیراقێ باش دزانیت پێشمەرگەیێ دستورى یە، ژبەر هندێ یێ دان و ستاندنێ دگەل وەزارەتا پێشمەرگە دکەت چ ژ روویى لەشکەرى یان سیاسی ڤە بیت".
kdp-