بەرپرسێكی حزبی لە كەركووك ڕای دەگەیەنێت، تەعریبێكی چڕ لەلایەن حەشدی شەعبییەوە لە كەركووك دەستی پێكردووە.



كاوە ئەحمەد، كارگێری لقی سێی پارتی دیموكراتی كوردستان لە كەركووك، ڕاگەیاند: "حەشدی شەعبی پرۆسەیەكی چڕی تەعریبی لە كەركووك دەست پێكردووە و ئێستاش دەستیان كردووە بە گۆڕینی ناوی شەقامەكانی كەركووك كە ژمارەیەكیان بەناوی فەرماندە شەهیدە پێشمەرگەكانەوە كرابوون و لە دوایەمین كردەوەشدا تابلۆی ناوی شەقامی شەهید (شێركۆ شوانی)یان لاداوە کردوویانە بەناوی كوژراوێكی حەشدی توركمانییەوە".



ئەو بەرپرسە، گوتیشی: "چەكدارانی حەشدی شەعبی لە كەركووك، وێنەكانی سەرۆك بارزانیشیان لاداوە، كە خەڵك لە خۆشەویستی سەرۆكەكەیان لە چەندین شوێنی ناو كەركووك وێنەیان دانابوو".



ڕوونیشی كردەوە: "دوای ساڵی 2003ەوە 550 قوتابخانەمان هەبوو لە كەركووك كە خوێندن تێیدا بە زمانی كوردی بوو و تا 15ی ئۆكتۆبەری ڕابردوو، ئاڵای كوردستان لەسەر ئەو قوتابخانانە دانرابوو، بەڵام حەشدی شەعبی ئاڵاكانی كوردستانی لەسەر ئەو قوتابخانانە لاداوە و ئاڵای عێراقیان لە شوێنەكەی داناوە".



ئاكراشی كرد: "فەرماندەی سەربازیی كەركووك، ئاڵای كوردستانی لە سەر قوتابخانەی 11ی ئاداری كچان هێنایە خوارەوە و ئاڵای عێراقی لەسەر دادەنا و پاشان قوتابیانی قوتابخانەكە ئاڵاكەی عێراقیان لادا و ئاڵای كوردستانیان دانایەوە".



بەرەبەیانی رۆژی دووشەممە 16ی ئۆكتۆبەری 2017، سوپای عێراق، میلیشیاكانی حەشدی شەعبی و حزبوڵڵای لوبنانی بە سەرپەرشتیی و بەشداریی سوپای پاسدارانی ئێران هێرشیان كردە سەر كەركووك و ناوچە كوردستانییەكانی ئەو سنوورەیان داگیر كرد و هەزاران هاووڵاتیی ڕوویان لە هەرێمی كوردستان كرد.






بسنیوز