ئەندامێكی ئەنجومەنی پارێزگای كەركووك ڕای دەگەیەنێت، لە سایەی حەشدی شەعبیدا دۆخی كەركووك تێكچووە.

جوان حەسەن، ئەندامی ئەنجومەنی پارێزگای كەركووك، ڕایگەیاند: "لەم رۆژانەی ڕابردوو لە سایەی حەشدی شەعبیدا، چەند گەنجێك لە كەركووك ڕفێنراون و پاشان لاشەكانیان دۆزراوەتەوە و ئێستاش دۆخێكی نا هەموار لە كەركووك دروست بووە".

ئەندامەكەی ئەنجومەنی پارێزگای كەركووك، گوتیشی: "لە بەر نەبوونی ئیدارە لە كەركووك ناتوانرێت كۆنتڕۆڵی بارودۆخی تەناهی بكرێت، ئەگەر ئەنجوومەنی پارێزگاش كۆبێتەوە، یەكەم بڕیار كە بیدەین دەركردنی سوپای عێراقە بۆ دەرەوەی شاری كەركووك و پێشتریش ئێمە ناڕازیی بوینە لە هاتنی پرۆسەكانی دیجلە بۆ كەركووك".

جوان حەسەن ڕاشی گەیاند: "ئێستاش بەو ئاراستەیە كار دەكەین كە دەسەڵات بگەڕێتەوە بۆ كورد، بۆ ئەوەی هەر هیچ نەبێت تا ڕادەیەك دۆخی كەركووك بەرەو هێوربوونەوە بچێت".

ڕوونیشی كردەوە: "ئێمە وەكو كوتلەی یەكگرتوو لە ئەنجوومەنی پارێزگای كەركووك تێبینی زۆرمان لە سەر ئەو دۆخە هەیە كە بە سەر كەركووك هێنرا و هەر بە هۆی ئەو دۆخەوە ئاوارەی هەرێمی كوردستان بووین".

لە لایەكی ترەوە جوان حەسەن، ئاماژەی بۆ ئەوەش كرد: "ئێستاش پەشیمان نیم لە دەنگدانم بۆ ڕیفراندۆم و بۆ هەڵكردنی ئاڵای كوردستان لە ئەنجومەنی پارێزگای كەركووك، ئەوانەش بە مافێكی سروشتی خۆمم زانیوە و لێی پەشیمان نیم".

ڕۆژی 16ی ئۆكتۆبەر چەكدارانی حەشدی شەعبی و سوپای پاسدارانی ئێران بەچاوساخی گرووپێكی ناو یەكێتیی نیشتمانیی كوردستان، كەركووك و خورماتوویان داگیركرد و پاشان حەشدی شەعبی دەستیان بە زنجیرەیەك تاوان كرد لەو شارانەدا.










باسنیوز