ئەنجومەنی ئاسایشی هەرێمی کوردستان ئاشکرای کرد، هێزەکانی حەشدی شەعبی بە پاڵپشتیی کۆماری ئیسلامیی ئێران و سەرپەرشتیی هادی عامری و ئەبو مەهدی موهەندیس، هێرشیان بۆ سەر سەنگەرەکانی پێشمەرگە کردووە.



لە زنجیرە تویتێکدا کە لە پێگەی تایبەتیی خۆی لە تۆڕی کۆمەڵایەتیی (تویتەر) بڵاوی کردەوە، ئەنجومەنی ئاسایشی هەرێمی کوردستان ئاشکرای کرد، هێزەکانی عێراق و میلیشیاکانی حەشدی شەعبی بە پاڵپشتیی ئێران، سەنگەرەکانی پێشمەرگەیان تۆپباران کردووە و دواتر هێرشیان ئەنجام داوە.



ئەوەشی ڕاگەیاندووە کە میلیشیاکان لە ڕەبیعەوە بەرەو ناوچەی (مەحموودییە) هەوڵی پێشڕەوییان داوە و لەلایەن پێشمەرگەوە دوو تانکی میلیشیاکان تێکشکێنراوە.



بەپێی ئەو زانیارییانەی ئەنجومەنی ئاسایشی هەرێمی کوردستان بڵاوی کردووەتەوە، هێزەکانی (لیوای عەباس، کەتیبەکانی جوندول ئیمام، رەعدول ساری، کەتیبەکانی ئیمام عەلی، حەرەکەی نەجبە، لیوای تەوفوف و لیوای حوسێن) بە سەرپەرشتیی هادی عامری و ئەبومەهدی موهەندیس لە هێرشەکەدا بەشدارن.



ئەنجومەنی ئاسایشی هەرێمی کوردستان ئەوەشی ئاشکرا کرد، تا کاتژمێر 9 و نیوی بەیانیی ئەمڕۆ، پێشمەرگە 3 تانک و 5 (هامڤی)ی ئەمریکی و 1 باجەری تێکشکاندووە کە میلیشیاکانی عێراق بە پشتیوانیی ئێران لە دژی پێشمەرگە بەکاریان هێناوە.



پێشتر (باسنیوز) ئەوەی بڵاو کردەوە کە هێرشەکەی حەشدی شەعبی لە دوو قۆڵەوە تێکشکێنراوە و زیانێکی زۆر بەر میلیشیاکانی حەشدی شەعبی کەوتووە، تاوەکوو ئێستاش شەڕەکە بەردەوامە.






باسنيوز