بەڕێوەبەری ئاسایشی خورماتوو ڕای دەگەیەنێت ئێستا زەمینە لەبار نییە بۆ گەڕانەوەمان بۆ شارۆچكەكە و حەشدی شەعبی و عەسائیبی ئەهلی حەق تێیدا باڵادەستن، هاووڵاتیانی عەرەبی سوننەش تەسلیمی دۆخەكە بوون و بە ڕواڵەت بوون بە شیعە.



عەقید كاوە مەلا پەروێز، بەڕێوەبەری ئاسایشی خورماتوو، ڕاگەیاند "دۆخی خورماتوو ئێستا زۆر خراپە و بە شەوان ماڵە كوردەكان تاڵان دەكرێن و دەسووتێنیدرێن، حەشدی شەعبی و عەسائیبی ئەهلی حەق بە تەنیا لە شارۆچكەكەن و سوپای عێراقی تێدا نییە، هاووڵاتیانی عەرەبی سوننەش تەسلیمی دۆخەكە بوون و ئاڵای شیعەیان هەڵكردووە و بە ڕواڵەت بوون بە شیعە".



گوتیشی "ئێستا ، بەهۆی بوونی میلیشیا شیعەكانەوە زەمینە لەبار نییە بۆ گەڕانەوەمان بۆ خورماتوو، بەڵام هەركات سەركردایەتیی سیاسی كورد بڕیاری لەسەر بدات دەگەڕێینەوە".



ناوبراو لەبارەی دۆخی ئاوارەكانی شارۆچكەكەوە ڕوونی كردەوە: "دۆخی ئاوارەكان زۆر خراپە، هەیانە نەخۆشیی هەیە، هەیە برینداری هەیە و هەشیانە پارەی نییە تەنانەت شیر بۆ منداڵەكەی بكڕێت".



باسنيوز