فەرماندەیەکی ھێزی پێشمەرگەی کوردستان، ئاماژە بەوە دەکات کە ئەو هێزەی هێنراونەتە هەرێمی کوردستان، بە تەنیا میلیشیاکانی حەشدی شەعبی نین، بەڵکوو چوار هێزی جیاوازن.

قادر قادر، فەرماندەی میحوەری گوێڕی ھێزی پێشمەرگەی کوردستان، رایگەیاند: "لەچەند شوێنێک چەکداری پاسداری ئێران کوژراون، لەھەندێک شوێن چەکداری حزبوڵای لوبنانی بینراون، سوپای عێراق و حەشدی شەعبیش سەرمەشقی ھێزەکان بوون، ھەروەھا چاودێر و پسپۆڕی سەربازیی ئێرانی لەگەڵیاندا بوون، عەبادی ھەرچی ھێزی ھەیە کۆی کردووەتەوە بۆ ئەوەی لەگەڵ گۆڕانی هاوکێشەی سەربازی، ھاوکێشەی سیاسیش بگۆڕێت".

ئەو فەرماندەیەی پێشمەرگە، ئەوەشی روون کردوەوە کە ئێستا ئێران و حزبوڵا بە فعلی لەشەڕ دان، بۆیە ”چوار ھێزی گەورە ھێرشیان کردووەتە سەر ھێزی پێشمەرگە، بەڵام قارەمانەنانە لووتیان شکێنراوە".

ئەوەشی ئاشکرا کرد کە لەناو ھێزەکاندا چەک و تەقەمەنیی جۆراو جۆر بەکار ھاتوون، بەشێکیان چەکی قورسن کە لەشەڕەکاندا بەکار ھاتوون. گوتیشی: "سەیرمان لێدێت چۆن ھاتنە ئەو بڕوایەی ئەو چەکانە لەدژی ھەرێمی کوردستان بەکار بھێنن، لەکاتێکدا گومان دەکرێت ئەو چەکانەیان بە سەرپەرشتیی کەسانی لێزان و شارەزا بەکار ھێنا بێت".

پێشتر ئەنجومەنی ئاسایشی هەرێمی کوردستان و فەرماندەی گشتیی هێزی پێشمەرگەی کوردستان ئەوەیان ئاشکرا کرد کە هێرشەکەی میلیشیاکانی حەشدی شەعبی و سوپای پاسداران بە هاوکاریی هێزێکی ناوخۆیی بووە و لە ئەنجامدا کەرکووک و خورماتوو و چەند ناوچەیەکی دیکەیان دەست بەسەردا گرتووە.










باسنیوز