بەهۆی داخستنی سنووری حاجی ئۆمەران لەلایەن كۆماری ئیسلامیی ئێرانەوە، كاریگەریی لەسەر كاسبكارانی سنوورەكە دروست كردووە و هەزاران كۆڵبەر کە بژیویان لەسەری بووە، بێكار بوون.

وەك كۆڵبەران و كاسبكارانی سنوورەكە ئاشكرای دەكەن، لە ‌سنووری حاجی ئۆمەران و پیرانشار لە ڕۆژهەڵاتی كوردستان، زیاتر لە 4 چوار هەزار كۆڵبەر لەلایەن ئێرانەوە كارتی كاركردنیان پێ دراوە، بەڵام بە هەزاران كۆڵبەری دیكەش لەو سنوورە و سنوورەكانی بە شێوەی دیکە كاری كۆڵبەریان دەكرد، كە تەمەنیان لەنێوان 12 تا 70 ساڵی دایە و بەردەوامیش ژمارەی ئەو كۆڵبەرانەی سنوور لە زیادبووندا بووە، بەڵام بەهۆی داخستنی سنوری حاجی ئۆمەران، بەربەستیش بۆ ئەوان دروست بووە و بێكار بوون.

لەمبارەوە فەرزنگ ئەحمەد، بەڕێوەبەری شاردەێی حاجی ئۆمەران، ڕایگەیاند، بەداخەوە لەگەڵ داخستنی سنووری نێودەوڵەتیی حاجی ئۆمەران لەلایەن ئێرانەوە، چەندان كاسبكار تووشی بێكاری بوون، دیارە زیانمەندانی یەكەمیش كۆڵبەر و كاسبكارانی سنوورەكەن، كە پێشتر ڕۆژانە بە هەزاران كۆڵبەر بە سنوورەكاندا كاڵاكانیان بە کۆڵ و لەسەر پشتی وڵاغەكانیان دەهێنایە هەرێمی كوردستان و لێرەشەوە بۆ رۆژهەڵاتی كوردستان، كەچی بەداخەوە ئێستا ئەوانە نانبڕاو بوون و بێكار بوون و ناتوانن وەك پێشتر كاری كۆڵبەری بكەن.










باسنیوز