سەرۆک وەزیرانی تورکیا سەرەڕای ڕاگەیاندنی پشتیوانیی خۆی بۆ داگیرکردنی کەرکووک لە لایەن میلیشیاکانی حەشدی شەعبی، داوای ئەوەی کرد کە گەلی کوردستان باجی ڕیفراندۆم نەدات.

ئەمڕۆ سێشەممە 17/10/2017، لە میانی کۆبوونەوەیەکی فراکسیۆنی پارتی داد و گەشەپێدان (ئاکەپە) لە پەرلەمانی تورکیادا، بینالی یەڵدرم، سەرۆک وەزیرانی تورکیا بە پێویستی زانی، لە کەرکووکدا بەڕێوەبەرایەتییەکی نوێ دابمەزرێنرێت و سەر لەنوێ دەستکاریی دیمۆگرافیای شارەکە بکرێت کە بە گوتەی ئەو ”لە کەرکووکدا تورکمان زۆرینەن“.

هاوکات جەختی لەوە کردەوە کە دەبێ دەرگای ئیبراهیم خەلیل بە لایەنی عێراقی بسپێردرێت. گوتیشی: ”نابێت ئەو گەلانەی لە کوردستان دەژین، باجی ڕیفراندۆمی سەربەخۆیی کوردستان بدەن“.

ڕۆژی دووشەممه 16/10/2017، میلیشیاکانی حەشدی شەعبی و سوپای پاسدارانی ئێران بە یارمەندیی هێزەکانی سەر بە پارتێکی سیاسیی کوردستان، هێرشیان کردە سەر کوردستان و شاری کەرکووک و زۆر ناوچەی دیکەیان خستە ژێر کۆنتڕۆڵی خۆیان.










باسنيوز