پێشمەرگەیێ کوردستانێ دماوەیێ چوار سالانەدا و دشەرەکێ دژواردا دگەل تیرۆرستێن داعشێ شیایە داستانێن مەزن تومار بکەت، لنوکە ژى دۆژمنان هێرشکریە سەر پێشمەرگەیى و ئەو یێ بەرڤانیێ ژ پیرۆزیێن خۆ دکەین، ژبەر ڤێ چەندێ شەرێ پێشمەرگەیى دژى هەر دۆژمنەکى شەرعیەتا جیهادێ وەردگریت.

پێغەمبەر خودێ محەمەد (سلاڤێن خودێ لسەر بن) دیارکریە، هەر کەسێ لسەر ئاخ و مال و نامووسا خۆ بهێتە کوشتن دبیتە شەهید، (مەلا ئیحسان رێکانى)، سەرۆکێ ئێکەتیا زانایێن ئایینێ ئیسلامێ تایێ دهۆک، بۆ مالپەرێ فەرمیێ پارتى دیموکراتى کوردستان گۆت:" پێشمەرگەیێ کوردستانێ بۆ ماوەیێ چوار سالانەیە دشەرەکێ دژواردا دگەل تیرۆرستێن داعشێ و شیایە داستانێن مەزن تومار بکەت، نوکە ژى حەشدا شەعبى و سوپایێ عیراقێ هێرشێن خۆ ئینانە سەر هێزێن پێشمەرگەیى ل دەڤەرا کەرکوکا دلێ کوردستانێ، ژبەر هندێ بەرەڤانیکرن و هێرشکرنا پێشمەرگەیى دکەفیتە دچارچوڤەیێ جیهادێ دا، جونکى دوژمنێ دەستدرێژى و توندیێ لسەر پیرۆزیێن پێشمەرگەیى دکەتن".

(مەلا ئێحسان)، زەلالکر:" جارەکێ پرسیار ژ پێغەمبەرێ خودێ (سلاڤێن خودێ لسەر بن) هاتەکرن، ئەگەر ئێک هاتە سەر مالا تە و دێ بۆ هێلى، پێغەمبەرێ خودێ گۆتێ نەخێر، ئەگەر شەرێ من کر دێ شەرى دگەل کەم و ئەگەر من ئەو کوشت ئەو جەهنەکى یە و ئەگەر وى ئەز کوشتم، ئەز شەهیدم".

(مەلا عیماد مەلا یاسین)، ئەندامێ ئێکەتیا زانایێن ئایینێ ئیسلامێ تایێ دهۆک پتر بەحسکر:" دهەمى ئایناندا مرۆڤایەتى دچارچوڤەیێ پەیوەندیان و راستگۆیێ دا دئێتە پاراستن، لێ ئەگەر ئەڤ مرۆڤایەتى یە نەهاتە پاراستن و لایەکى هەولا ژناڤبرنا نامووس و ئەرد و کەرامەتا لایەنێ دیتر کر ژبۆ ژناڤبرنا وان و پێشلکاریا پیرۆزیێن وان کر، لڤێرە دڤێت بەرەڤانیێ ژخۆ بکەت، پشتى لسەر دان و ستاندن و پێکڤەژیان و ئاشتێ رازى نەبووین، لوى دەمى دێ بیتە جیهادکەر بۆ پاراستنا شەرەف و کەرامەتا خۆ".

(مەلا عیماد مەلا یاسین)، خویاکر:" نابیت مرۆڤ دەستان بۆ دۆژمنێ خۆ داهێلیت، تا نوکە ژى پێشمەرگەیێ کوردستانێ هێرش نەکریە لسەر چ هێز و لەشکەران، لێ دۆژمنان هێرشکریە سەر پێشمەرگەیى دئاخا واندا و پێشمەرگە یێ بەرڤانیێ ژ پیرۆزیێن خۆ دکەن، ژبەر ڤێ چەندێ شەرێ پێشمەرگەیى دژى هەر دۆژمنەکى چ (داعش یان حەشدا شەعبى یان ژى سوپایێ عیراقێ) بیت شەرعیەتا جیهادێ وەردگریت".
kdp-