سەرۆکی سەنتەری ھودا بۆ لێکۆڵینەوەی سیاسی دەڵێت، ئەوەی لە کەرکووک ڕووی داوە موئامەرەیەکە لە لایەن بەغداوە دژی ھەرێمی کوردستان دەکرێت، بەڵام ئەمە بە شکستی ئەوان تەواو دەبێت و جەختیش دەکاتەوە، ئەگەر لە نێوخۆمان خیانەت نەکرابووایە، ھەرگیز حەشدی شەعبی نەیدەتوانی نزیکی کەرکووک بێتەوە.

سەرۆکی سەنتەری ھودا بۆ لێکۆڵینەوەی سیاسی، (د. محەمەد بازیانی) بە ماڵپەڕی فەرمیی پارتی دیموکراتی کوردستانی ڕاگەیاند: ''ئێمە ئێستا لە دەوروبەری کەرکووکین و ئەوەی ڕووی داوە موئامەرەیەکە دژی ھەرێمی کوردستان دەکرێت، بەڵام با گەلی کورد دڵنیا بێت، بە شکستی ناحەزانی کورد تەواو دەبێت.''

(د. محەمەد بازیانی) گوتیشی: ''ھەرێمی کوردستان جارێکی دیکە ناکەوێتە ژێردەستی ئەوان، بەڵام بەداخەوە ھەست دەکرێت خیانەت لە نێوخۆی ئێمە دەکرێت، گەرنا حەشدی شەعبی نەیدەتوانی لە کەرکووک نزیک بێتەوە، سەرەڕای ئەمەش خەڵکی کەرکووک و ھێزی پێشمەرگە بە ورەیەکی بەرزەوە بەرگری لە خاکی کەرکووک دەکەن و لە بەرەی شەڕدا ئامادەن.''
(بازیانی) ڕوونیشی کردەوە: ''ئەمە سەرەتایەکە بۆ بەدیھاتنی ئاواتی گەلی کورد و کۆمەڵگای نێودەوڵەتیش دێتە سەرخەت و بێدەنگ نابن و ئەو زوڵمەی لە گەلی کوردستان دەکرێت، قبووڵ ناکرێت.''

(عەدنان کەرکووکی)، گوتەبێژی ئەنجومەنی سەرکردایەتیی پارتی دیموکراتی کوردستان لە کەرکووک-گەرمیان بە ماڵپەڕی فەرمیی پارتی دیموکراتی کوردستانی ڕاگەیاند: ''بە ھۆی چۆڵکردنی سێ میحوەری کەرکووک لە لایەن ھەندێک لە سەرکردەکانی یەکێتییەوە، حەشدی شەعبی توانی زەفەر بە کەرکووک ببات، بۆیە پێویستە سەرکردایەتیی کورد پلانێکی نوێ دابنێت و ڕووبەڕووی ئەو پلانە ببێتەوە و لەناوی ببات و دەست بەسەر کەرکووکدا بگرێتەوە.''
kdp-