بە فەرمانی بەشێکی یەکێتیی نیشتمانیی کوردستان، پێشمەرگە بە تەواوی لە خورماتوو کشاوەتەوە و دانیشتووانە کوردەکەی شارەکە داوای بەهاناوەچوون دەکەن و هەڕەشە لەسەر ژیانیان هەیە.



ئەکرەم ساڵح، بەرپرسی لقی گەرمیانی پارتی دیموکراتی کوردستان ئاماژە بەوە دەکات کە خورماتوو چۆڵ کراوە و گەڕەک و کۆڵانە کوردنشینەکان بە تەواوی کەوتوونەتە دەست میلیشیاکانی حەشدی شەعبی. ئەوەشی ڕوون کردەوە کە حەشدی شەعبی بە دەستیان بە تاڵانکردن و سووتاندنی ماڵی خەڵکی کردووە.



لەلایەن خۆیەوە حاجی زوھدی، بەرپرسی ھێزە خۆبەخشەکانی خورماتوو راگەیاند: "بارەگای قایمقامییەت و مەڵبەندی یەکێتی و چەند شوێنێکی دیکەی خورماتوو گیراون و ئێستاش جگە لە خۆبەخشەکان، خورماتوو پێشمەرگەی تێدا نەماوە". جەختیشی لەوە کردەوە کە ئەوان تاوەکوو دوا دڵۆپی خوێنیان بەرگری لە کوردستان دەکەن.


باسنیوز