چەکدارە کوردەکان و تورکمانەکانی خەڵکی سنووری پارێزگای کەرکووک و شاری خورماتوو، بەھۆی ئامادەنەبوونیان بۆ شەڕکردن لە دژی پێشمەرگە، چەکەکانیان دادەنێن. فەرماندەکانی پێشمەرگەش ئەوە پشتڕاست دەکەنەوە.



فەرماندەیەکی مەیدانیی پێشمەرگە لە نزیک گوندی (بەشیر) لە باشووری کەرکووک بە (باسنیوز)ی ڕاگەیاند، لە دوو ڕۆژی ڕابردوودا، ژمارەیەکی زۆر لەو چەکدارە کورد و تورکمانانەی کە لە ماوەکانی ڕابردوودا چوونەتە نێو حەشدی شەعبی و ئەرکیان پێ دراوە، چەکیان داناوە و ڕەتیان کردووەتەوە لە ھێرشکردنە سەر پێشمەرگە، بەشداری بکەن.



ئەوەشی ڕوون کردەوە کە چەکدارە کوردەکانی حەشدی شەعبی ئامادە نین شەڕ لە دژی پێشمەرگە و خاکی کوردستان بکەن و بە ئاشکرا ڕایانگەیاندووە کە ئەوان بۆ شەڕکردن دژی پێشمەرگە چەکیان ھەڵنەگرتووە. گوتیشی: ”چەکدارە تورکمانەکانی حەشدی شەعبی کە بەشێکی زۆریان خەڵکی شاری خورماتوون، باسیان لەوە کردووە کە چەکدارانی خەڵکی ناوەڕاست و باشووری عێراق لەنێو حەشدی شەعبی، دوای کۆتاییھاتنی شەڕیان لەگەڵ پێشمەرگە، بۆ شار و ناوچەکانیان دەگەڕێنەوە، بەڵام تورکمانەکان لەگەڵ کورددا ساڵەھای ساڵە دەژین و ناتوانن دوژمنایەتی بۆ ھەتا ھەتایە ھەڵبژێرن“.



فەرماندە مەیدانییەکەی پێشمەرگە ئاماژەی بەوە کرد کە لە چەند سەنگەرێکی حەشدی شەعبیدا، دوای وازھێنانی چەکدارانی کورد و تورکمان، چەکداری دیکەی حەشدی شەعبی ھێندراون و شوێنەکانیان پڕکراوەتەوە.



لەمبارەیەوە حوسێن یەزدانپەنا، فەرماندەی ھێزی پێشمەرگە لە میحوەری باشووری کەرکووک بۆ (باسنیوز) گوتی: "خەڵکێکی زۆری ناو حەشدی شەعبی وازیان لەو ڕێکخراوە ھێناوە، بەتایبەت کوردەکان و تورکمانەکان، چونکە ئامادە نەبوون لەگەڵ پێشمەرگە شەڕ بکەن، لەھەمان کاتدا زۆر سوپاسی خەکانێکی زۆری ناو حەشدی شەعبی دەکەین کە بەردەوام زانیاریی دەدەنە پێشمەرگە و خۆیان پێمان دەڵێن کە ئەوان بۆ پارەیەک ئامادە نین لەگەڵ کوردستان بجەنگێن، لە ھەمانکاتدا خەڵکێکی زۆریان چەکەکانیان ڕادەستی فەوجەکانیان کردووەتەوە".



ئەوەشی خستە ڕوو: "حەشدی شەعبی دروستکراوی وڵاتێکی دراوسێیە، بۆیە بە ئیرادەوە شەڕ ناکەن و ئەوەی دەیکەن بەشێکی بە فشارە و بەشێکیان ھەڵخەڵەتێنراون، لە ھەمانکاتدا ئەوان باش دەزانن، شەڕکردن لەگەڵ پێشمەرگە قورسە، چونکە بەشێکی زۆریان لە سوپای پێشووی عێراق بوون و دەزانن کارەساتی لێ دەکەوێتەوە”.



لەلایەن خۆیەوە ئەکرەم ساڵح، بەرپرسی لقی گەرمیانی پارتی دیموکراتی کوردستان، بە (باسنیوز)ی ڕاگەیاند: "لەناو ڕیزەکانی حەشدی تورکمانی و حەشدی شەعبیدا نیگەرانی ھەیە، ترسیان لە شەڕی پێشمەرگە ھەیە، بۆیە بەجێھێشنی ڕیزەکانی حەشدی شەعبی بەردەوامە و نایانەوێت خۆیان تووشی شەڕێک بکەن کە دواجار خۆیان تێیدا زەرەرمەند دەبن".



ئەوەشی خستە ڕوو: "میلیشیاکانی حەشدی شەعبی بە فەرمانی عەبادی دەجووڵێنەوە، بۆیە ئەوانیش لەناو خۆیاندا ناکۆکن و بەشێکیان سەر بە مالیکین و بەشێکیان سیستانی و بەشێکیان سەدرین و ئەوانە وای کردووە کێشە لەناویاندا پەیدا ببێت".






باسنيوز