ئەمڕۆ چوارشەممە، سەرۆکی نێردەی لێژنەی نێودەوڵەتیی کاروباری ونبووەکان لە عێراق سەردانی ئەنجومەنی باڵای کاروباری خانمانی کرد.



ئەمڕۆ چوارشەممە 11/10/2017، لینا لارسۆن، سەرۆکی نێردەی لێژنەی نێودەوڵەتیی کاروباری ونبووەکان لە عێراق سەردانی ئەنجومەنی باڵای کاروباری خانمانی کردو لەلایەن فلۆرین گۆرگیس سێودین، بەڕێوەبەری گشتیی دیوان لە ئەنجومەن و دلێر ئیبراھیم بەڕێوەبەری راگەیاندن و پەیوەندییەکان پێشوازی لێکرا.



لە دانیشتنێکدا بەئامادەبوونی کریستیان تابت، پسپۆری پەیوەندییە نێودەوڵەتییەکان، گفتوگۆ لەباری رەوشی مافی مرۆڤ بەگشتی و مەسەلەی ونبووەکان لە ھەرێمی کوردستان کرا.

ھەروەھا تیشک خرایە سەر رەوشی دژواری پێکھاتەی ئێزیدی و مەسیحی و پێکھاتەکانی تر بەھۆی دەستدرێژیی و تاوانەکانی تیرۆریستانی داعش لە کوشتن، رفاندن و بێسەروشوێنکردنی چەندین ئافرەت ومنداڵ و پیاو، لەلایەن تیرۆریستانەوە.



لەمیانی کۆبوونەوەکەدا گرنگی پەرەپێدانی پەیوەندییە دووقۆڵییەکانی نێوان ھەردوولا گفتوگۆی لەبارەوە کراو، بڕیاردرا لە داھاتوودا ھاوکاری و ھەماھەنگی زیاتر لە رووی ئەو پرسانەی پەیوەندییان بە پرسی ونبووەکان بەگشتی، بەتایبەتیش ئاشکراکردن و دۆزینەوەی چارەنووسی ئافرەتانە ونبووەکان، بەھەماھەنگی نێوان ھەردوولا کاری لەسەر بکرێت.


bas news-