پرسه‌ی كۆچی دوایی مام جه‌لال تاڵه‌بانی سكرتێری گشتی یه‌كێتی نیشتمانی كوردستان و سه‌رۆك كۆماری پێشوو عێراق به‌ كۆتا هات و حه‌یده‌ر عه‌بادی سه‌رۆك وه‌زیرانی عێراق نه‌ له‌ كوردستان و نه‌ له‌ به‌غدا به‌شداری له‌ پرسه‌كه‌ نه‌كرد.



ئه‌مڕۆ دووشه‌ممه‌(9-10-2017) پرسه‌ی مام جه‌لال تاڵه‌بانی له‌ میوانخانه‌ی ڕه‌شید له‌ شاری به‌غدا به‌ڕێوه‌چوو كه‌ له‌لایه‌ن فوئاد مه‌عسوم سه‌رۆك كۆماری عێراقه‌وه‌ سه‌رپه‌رشتی ده‌كرا و ژماره‌یه‌ك له‌ به‌رپرسانی حكوومه‌ت و لایه‌نه‌ سیاسییه‌ عێراقییه‌كان به‌شداربوون به‌ڵام ئه‌وه‌ی جێگای سه‌رنجه‌ حه‌یده‌ عه‌بادی سه‌رۆك وه‌زیرانی عێراق به‌شداری له‌و مه‌راسیمه‌ نه‌كرد.



ڕۆژی (6-10-2017) ته‌رمی مام جه‌لال تاڵه‌بانی له‌ ڕێگه‌ی فڕۆكه‌وه‌ له‌ ئه‌ڵمانیاوه‌ گه‌یه‌نرایه‌وه‌ هه‌رێمی كوردستان و له‌ فڕۆكه‌خانه‌ی نێوده‌وڵه‌تی سلێمانی به‌ مه‌راسیمێكی پرۆتۆكۆلی كه‌ تیایدا سه‌رۆكی هه‌رێمی كوردستان و ژماره‌یه‌ك له‌ به‌رپرسانی كوردستان و عێراق و وڵاتان ئاماده‌ی بوون پێشوازیی لێكرا به‌ڵام عه‌بادی له‌و مه‌راسیمه‌ش ئاماده‌ نه‌بوو.
basnews-