- (عسمەت رەجەب)، بەرپرسێ لقى 14 یێ پارتى دیموکراتى کوردستان راگەهاند، بەرى هاتنا تیرۆرستێن داعشێ و بەرى بریارا ئەنجامدانا ریفراندۆمێ، خەلکێ دەشتا نەینەوا و دەڤەرێن دەردۆرێ مووسل بریارا چارەنڤیسێ خۆ دابوو، کۆ ببنە پشکەک ژ هەرێما کوردستانێ، نوكە ژى خەلکێ وان دەڤەرا دخوازن پشکداریێ دپرۆسیسا هەلبژارتنێن پەرلەمانێ کوردستانێ دا بكەن، جونکى خۆ پشکەک ژ هەرێما کوردستانێ دبینن.

خەلکێ دەشتا نەینەوا و دەردۆرێن مووسل رێژا 85% پشکدارى ریفراندۆما سەربەخۆیا کوردستانێ ببوون و رێژا 89% ێ دەنگ دا ب بەلێ دابوو، (عسمەت رەجەب)، بەرپرسێ لقى 14 یێ پارتى دیموکراتى کوردستان ل مووسل، بۆ مالپەرێ فەرمیێ پارتى دیموکراتى کوردستان گۆت:" بەرى هاتنا تیرۆرستێن داعشێ بۆ ناڤ ئاخا عیراقێ و بەرى سەرکردایەتیا سیاسى ل هەرێما کوردستانێ بریارا ئەنجامدانا ریفراندۆمێ بدەت، خەلکێ دەشتا نەینەوا و دەڤەرێن دەردۆرێ مووسل بریارا چارەنڤیسێ خۆ دابوو، کۆ ببنە پشکەک ژ هەرێما کوردستانێ، لێ پشتى داعش هاتین ئەو دەلیڤە دروست نەبوو داخوازیا خۆ بجه بینن، ژبەر هندێ پشتى داعش هاتیە شکاندن و پێشمەرگەیى دەڤەرێن دەرڤەیى هەرێمێ رزگار کرین و بریارا ئەنجامدانا ریفراندۆما سەربەخۆیا کوردستانێ ژلایێ سەرکردایەتیا سیاسى ڤە ل کوردستانێ هاتیەدان، ئێکسەر خەلکێ دەشتا نەینەوا ب هەمى نەتەوە و پێکهاتەیێن خۆ ڤە (کورد و عەرەب و تورکمان و شەبەک و سریانى) ب گەرمى پشکدارى پرۆسیسا ریفراندۆمێ بوون وەک پارێزگەهێن دیتر یێن هەرێما کوردستانێ و ئەنجام ژى گەلەک جهێ رازیبوونێ بووینە".

(عسمەت رەجەب)، خویاکر:" بەرى نوکە ژى حکومەتا هەرێما کوردستانێ و پارتى دیموکراتى کوردستان ژى گرنگى دایە ڤان دەڤەران، ژبەر ڤێ ئێکێ ژى وان دڤیا دگەل هەرێما کوردستانێ بن، دیسان خەلکێ وان دەڤەرا دخوازن پشکداریێ دپرۆسیسا هەلبژارتنێن پەرلەمانێ کوردستانێ دا بکەن، جونکى خۆ پشکەک ژ هەرێما کوردستانێ دبینن، بێگومان ئەڤ پشکە ژى دێ ئێنە پاراستن و لوێ باوەرێ مە دێ ئەڤ بابەتى ئێتە خواندن، لێ ب مخابنى ڤە دەمێ کێمە و ئەگەر هاتوو ئەڤ هەلبژارتنە هاتنە پاشئێخستن دێ ئەو ژى پشکدار بن".

بەرپرسێ لقى 14 یێ پارتى دیموکراتى کوردستان، دا دیارکرن:" گەلەک بریار ژلایێ حکومەتا عیراقێ ڤە دژى کورد و کوردستانیان هاتنە دان، لێ ددەمەکێ کورتدا هاتنە بریاردان و نائێنە بجهئینان و بتنێ دێ مینن نڤیسین لسەر لاپەرەکى و چ مەترسى بۆ نابیت".
kdp-