سەرکردەیەکی دەوڵەتی یاسا رایدەگەیێنێت، پابەندی رێککەوتنەکەی بارزانی و عەلاوی و نوجەیفی و سەردانەکەی سەلیم جبووری بۆ هەولێر نابن.

رەسول رازی، سەرکردە لە ئیئتیلافی دەوڵەتی یاسا بە سەرۆکایەتیی نووری مالیکی بە (تۆڕی میدیایی رووداو)ی راگەیاند، رێککەوتنەکەی مەسعود بارزانی، سەرۆکی هەرێمی کوردستان، ئەیاد عەللاوی و ئوسامە نوجەیفی، جێگرانی سەرۆککۆماری عێراق و سەردانەکەی سەلیم جبووری، سەرۆکی پەرلەمان "بەبێ ئاگاداری ئێمە بووە و هەوڵی تاکە کەسی و تاکلایەنە بووە، بۆیە پابەندیان نابین".

رەسول رازی راشیگەیاند "تاکە مەرجی ئێمە بۆ دەستپێکردنەوەی دانوستاندن و گفتوگۆکان لەگەڵ هەرێمی کوردستان هەڵوەشانەوەی ئەنجامەکانی گشتپرسی و پابەندبوونە بە دەستپێشخەرییەکەی مەرجەعی باڵا و بڕیارەکانی دادگای فیدراڵی و حکومەتی عێراق".

رۆژی یەکشەممە 8-10-2017 سەلیم جبووری، سەرۆکی پەرلەمانی عێراق سەردانی هەولێری کرد و لەگەڵ مەسعود بارزانی، سەرۆکی هەرێمی کوردستان کۆبووەوە.

رۆژی شەممە 7-10-2017 بارزانی لە سلێمانی لەگەڵ ئەیاد عەللاوی و ئوسامە نوجەیفی لەبارەی چۆنییەتی چارەسەركردنی بابەت و كێشە پەیوەندیدارەكانی نێوان هەولێر و بەغدا كۆبووەوە و لەسەر چوار خاڵ رێككەوتن.

د. فوئاد حوسێن، سەرۆكی دیوانی سەرۆكایەتیی هەرێمی کوردستان رایگەیاند، بەشداربووانی کۆبوونەوەکە لەسەر چوار خاڵ رێککەوتوون، ئەوانیش:

1- دەستپێكردنی گفتوگۆ و كۆبوونەوەكان لەنێوان لایەنە سیاسییە سەرەكییەكان لە عێراق بۆ هێوركردنەوەی بارودۆخەكە.

2- كۆبوونەوەكان لەسەر ئەجێندای كراوە ئەنجامبدرێن.

3- هەڵگرتنی دەستبەجێی سزاكان لەسەر هەرێمی كوردستان.

4- دەستپێكردنی كۆبوونەوەكان لە داهاتووێكی نزیكدا، بە پشتبەستن بە ئالییەتێكی تایبەت بۆ هەماهەنگی بەردەوام.


رووداو