گوته‌بێژى به‌ڕێوه‌به‌رایه‌تى پۆلیسی گه‌رمیان، گیان له‌ ده‌ستدانى هاووڵاتییه‌كى ته‌مه‌ن 84 ساڵى به‌هۆى ڕووداوێكى هاتوچۆوه‌ له‌ نزیك فولكه‌ى ناوچه‌ى پیشه‌سازى كه‌لار ڕاگه‌یاند.


ڕائیدى مافپه‌روه‌ر عه‌لى جه‌مال قدوورى گوته‌بێژى به‌ڕێوه‌به‌رایه‌تى پۆلیسی گه‌رمیان، به‌ (باسنیوز)ى ڕاگه‌یاند "سه‌رله‌به‌یانى ئه‌مڕۆ 6/10/2017 له‌ نزیك فولكه‌ى ناوچه‌ى پیشه‌سازى شارى كه‌لار، ئۆتۆمبێلێكى جۆرى (توێتا) له‌ هاووڵاتیه‌كى ته‌مه‌ن 84 ساڵى داوه‌ به‌ناوى محه‌مه‌د ئه‌حمه‌د قادر و پاش گه‌یاندنى به‌ نه‌خۆشخانه‌ى فریاكه‌وتنى شه‌هید هه‌ژار له‌ كه‌لار، به‌هۆى سه‌ختى برینه‌كه‌یه‌وه‌ گیانى له‌ ده‌ست داوه‌ و ئۆتۆمبێله‌كه‌ش وه‌رگه‌ڕاوه‌".


گوتیشی "ناوبراو دانیشتووى گه‌ڕه‌كى كه‌لارى كۆنه‌ و پاش ڕووداوه‌كه‌ ته‌رمه‌كه‌ى ڕه‌وانه‌ى پزیشكى دادوه‌رى كه‌لار كراوه‌ بۆ ئه‌نجامدانى توێكارى پزیشكى".


ئاماژه‌ى به‌وه‌ش دا "شۆفێرى ئۆتۆمبێله‌كه‌ به‌پێى ماده‌ى 24ى یاساى هاتوچۆ به‌ند كراوه‌".
BAS NEWS -