سیاسەتمەدارێکی کورد باس لە پەیوەندیی نێوان ھەرێمی کوردستان و تورکیا دەکات لەدوای ڕیفراندۆم و نایشارێتەوە کە "ھەنێک گۆڕانکاری ڕوودەدات". جەختیش لەوە دەکاتەوە کە تائێستا لەژێر هیچ گوشارێکدا، بارزانی لە ڕێگەی سەربەخۆیی لای نەداوە.



محەمەد ئەمین پێنجوێنی، کەسایەتیی سیاسی و سیاسەتمەدار کە لە پارتی کرێکارانی کوردستان (پەکەکە)شەوە نزیکە، بە (باسنیوز)ی ڕاگەیاند: ”کەمێک پێش ئێستا، مەولوود چاویشئۆغلۆ، وەزیری دەرەوەی تورکیا لێدوانی ڕۆژنامەنووسی دا و گوتی ڕێگەی دیکە لە دژی کوردستان دەگرنە بەر، دیارە ئەو رێگایە بریتی نییە لە داخستنی سنوور و راگرتنی ھەناردەی نەوت، چونکە لە پرسی دەروازەی سنوور و پەیوەندیی بازرگانیدا تورکیا قازانجی زۆرە، زۆربەی کۆمپانیاکانی لە کوردستان کار دەکەن، ئەمانەش سەرمایەی گەورەن بۆ تورکیا“.



ڕوونیشی کردەوە کە ”پەیوەندیی نێوان تورکیا و هەرێمی کوردستان، لە ئاستی پەیوەندیی دوو دەوڵەتە، بۆیە باوەڕ ناکرێت تورکیا پەنا بباتە بەر بژاردەی داخستنی سنوور".



محەمەد ئەمین پێنجوێنی جەختی لەوە کراوە کە تائێستا فشار بە داخستنی مەرزەکان و داخستنی فڕۆکەخانەکان و هەڕەشەی جۆراوجۆر هەبوون، بەڵام ”ئەوەی دەبینرێت، هیچ هەڕەشەیەک کاریگەری لەسەر بارزانی نەکردووە تاوەکوو لە ڕێگەی سەربەخۆیی کوردستان پەشیمان بێتەوە، بەڵکوو بەردەوامە لەسەر ئەو ڕێگەیە“.



باسنيوز