بەهۆی دەنگدان بۆ سەربەخۆیی كوردستان، ئەفسەرێكی پۆلیسی دانیشتووی شارەدێی گوڵاڵە، لەكاتی ڕۆیشتنەوەی بۆ دەوام لە پارێزگای دیالە دەستگیر كرا و بەڕێوەبەری شارەدێیەكەش ڕای دەگەیەنێت خانەوادەی كارمەندەكە خاوەنی 13 شەهیدن لەپێناوی كوردستاندا.

یەعقووب یووسف مەلا عەلی بەڕێوەبەری شارەدێی گوڵاڵە، ڕایگەیاند: "دوێنێ 26/9/2017 ئەفسەرێكی پۆلیسی دانیشتووی شارەدێی گوڵاڵە، لە كاتی گەڕانەوەیدا بۆ دەوامی ئاسایی خۆی لە پۆلیسی دیالە، بەهۆی دەنگدانی بە سەربەخۆیی كوردستان دەستگیر كراوە".

گوتیشی: "ئەفسەرەكە ناوی (غەسان شاتی)یە و پلەی ڕائیدە و سەر بە هۆزی (كروی)یە، بنەماڵەکەی لەپێناو كوردستاندا خاوەنی 13 شەهیدن".

ئاماژەی بەوەش دا: "ناوبراو تا ئێستا ئازاد نەكراوە و ئەگەری ئەوەش هەیە بە تۆمەتی هاندانی خەڵك بۆ دەنگدان بە سەربەخۆیی كوردستان سزا بدرێت".

ڕێکەوتی 25/9/2017 پرۆسەی ڕیفراندۆم بۆ سەربەخۆیی كوردستان لە هەرێمی كوردستان و ناوچە كوردستانییەكانی دەرەوەی ئیدارەی هەرێمی کوردستان بەڕێوە چوو.










باسنیوز