چاودێرێکی سیاسی ئاماژە بە ژمارەیەک کارتی فشاری هەرێمی کوردستان دەکات کە دەتوانێت لە بەرامبەر هەڕەشەکانی بەغدا یان وڵاتانی دیکە بەکاریان بهێنێت.



ئاسۆ کەریم، نووسەر و چاودێری سیاسی، لە پێگەی تایبەتیی خۆی لە تۆڕی کۆمەڵایەتیی (فەیسبووک)، ژمارەیەک خاڵی بەهێزی کوردستانی ئاماژە پێداوە کە وەک کارتێک دەکرێ لە بەرامبەر هەڕەشەکانی بەغدا یان هەر هەڕەشەیەکی دیکە بەکار بهێندرێت و ڕێگەی بڵاوکردنەوەی داوە.



بەپێی بۆچوونی ئاسۆ کەریم، کارتەکان بریتین لە:

١) خواست و ئیرادەی بەئاشتییانە دەربڕاو لە ڕیفراندۆمی 25ی ئەیلوولی 2017 لەلایەک و خیتابێکی نەرم و ھاوسەنگ بۆ بەدیھێنانی ئیرادەی خەڵک.

٢) خۆڕاگری و یەکێتیی ھێزە سیاسییەکانی کوردستان و پێکەوە بڕیاردان، واتە مانەوەی ئەنجومەنی باڵای ڕیفراندۆم و بەرفرەوانکردنی کە ھەم (گۆڕان) و (کۆمەڵی ئیسلامی)یش بگرێتەوە، ئەمەش بە مانای ”پشت بەستن بە خۆ“ دێت.

٣) ڕووباری دیجلە و سەرچاوەکانی دیکەی ئاو و ھەر سێ بەنداوی (مووسڵ، دوکان و دەربەندیخان) لەبندەستی حکوومەتی ھەرێمی کوردستاندان.

٤) گازو نەوتێکی زۆر.

٥) بازاڕێک کە بە ئاسانی لەدەست نادرێ.

٦) خاکێکی بەپیتی کشتوکاڵی.

٧) ھەرێمێکی زێتر لە 70 ھەزار کیلۆمەتر چوارگۆشە و میللەتێکی 5 تا 6 ملیۆنی.

٨) ھێزەکانی پێشمەرگە و پۆلیس و ئاسایش کە بەسەریەکەوە زۆر لە 200 ھەزار پتر دەبن.

٩) پشتەوانیی براکانمان لە پارچەکانی دیکە کە بەڕای خۆم فاکتەرێکی گرنگە.

١٠) ڕەوەندێکی کورد کە زێتر لە 1 ملیۆن دەبن و لە ھەر 5 کیشوەرەکە و زۆربەی وڵاتانی دنیادا دەژین و دەکرێ ھاوکاریی زۆری کوردستان بکەن، ئەگەر ڕێک بخرێن.

١١) پشتیوانیی لە عارەبی سوننە بکرێ ئەگەر داوای چاکگردنەوەی ناوچەکانیان و گەڕانەوەی ئاوارەکان و دەرکردنی حەشدی شەعبی و پێکھێنانی ھەرێمێک بۆ خۆیان بکەن.

١٢) دەست بە چاکسازی بکرێ و دەستوورێکی مەدەنیی دیموکرات لەسەر ئەو پرەنسیپانە دابندرێ کە ئەنجوومەنی باڵای ریفراندەم ڕێککەوتنی لەسەر کردووە.



لەگەڵ ئاماژەدان بە چەندان خاڵی دیکەی بەهێز.


باسنیوز