بەشێکی زۆری ھاووڵاتیانی لە سلێمانی بە جلوبەرگی ڕەسەنی کوردەوارییەوە بەشداریی پڕۆسەی ڕیفراندۆم دەکەن و خوازیارن ئەم ڕیفراندۆمە سەربەخۆیی ھەرێمی کوردستانی بەدواوە بێت.

لە سلێمانی ڕاگەیانرا: "پڕۆسەی دەنگدان لە شاری سلێمانی بەردەوامە و ھاووڵاتیان بە گڕوتینێکی زۆرەوە ڕوو لە سندووقەکانی دەنگدان دەکەن بۆ ئەوەی بە دەنگی (بەڵێ) بەشداریی ڕیفراۆندۆمی سەربەخۆیی بکەن.

ھاووڵاتیانی شاری سلێمانی، دەنگدان بە ڕیفراندۆم بە پرسێکی نیشتمانیی گرنگ و چارەنووسساز دەزانن، بە جۆرێک پێیان وایە ئامانجی سەرەکی لە ئەنجامدانی ڕیفراندۆم بۆ دامەزراندنی کیانێکی سەربەخۆیە و کوردیش مافی ئەوەی ھەیە خاوەنی دەوڵەتی خۆی بێت.

پرۆسەی دەنگدان بۆ ڕیفراندۆمی سەربەخۆیی کوردستان لە کاتژمێر 8ی بەیانیی ئەمڕۆ دووشەممە لە سەرجەم هەرێمی کوردستان و ناوچە کوردستانییەکانی دەرەوەی ئیدارەی هەرێمی کوردستان دەستی پێکردووە و هەتا کاتژمێر 6ی ئێوارە بەردەوامە.










باسنیوز