بەرپرسی ئەنجومەنی سەرکردایەتیی کەرکووک-گەرمیانی پارتی دیموکراتی کوردستان، ئاماژە بەوە دەکات، ئێستا هەرچوار پارچەی کوردستان دڵیان لای کەرکووکە، بینیمان کاتێک مەترسی لەسەر کەرکووک بوو، چۆن سەرکردەی هەرچوار پارچەی کوردستان بەدەم کەرکوکییەکانەوە هاتن.

ئەنجومەنی پارێزگای کەرکووک و پارێزگاری ئەو شارە لە ڕاگەیەنراوێکدا ئاماژەیان بەوە کرد، کە ئەوان لەگەڵ پرۆسەی ڕیفراندۆمن لە شارەکە و لەو بارەشەوە ئامادەکاری کراوە، ئەمڕۆش کۆمیسیۆنی باڵای سەربەخۆی هەڵبژاردن و ڕاپرسی ئاماژە بەوە دەکات، کە هەموو ئامادەکارییەک بۆ پرۆسەکە لە کەرکووک تەواو بووە، سندووقەکان گەیشتوون و لەگەڵ سپێدەی بەیانیی ٢٥\٩دا خەڵکی ئەو شارە دەنگ دەدەن. (سەڵاح دەلۆ)، بۆ ماڵپەڕی فەرمیی پارتی دیموکراتی کوردستان گوتی: ''کۆبوونەوەکەی ئەمڕۆ، یەکشەممە، 24/9/2019، کۆبوونەوەیەکی ھاوبەش بوو لە نێوان یەکێتی و پارتی و یەکگرتوودا. ئامانجی کۆبوونەوەکەش لەسەر بابەتی ڕیفراندۆم لە شاری کەرکووک بوو، گوایە برادەرانی یەکێتی و بەتایبەت مەڵبەندی (2)ی یەکێتی لە کەرکووک لەگەڵ دواخستنی پرۆسەی ڕیفراندۆم بوون لە شارەکە، بەڵام دواتر ئەوە چارە کرا و بە وردی قسەی لەبارەوە کرا و ڕێکار و ئامادەکاری لەو بارەوە دانراوە.''

بەرپرسی ئەنجومەنی سەرکردایەتیی کەرکووک - گەرمیانی پارتی، ئەوەیشی خستە ڕوو: ''بە دەنگی زۆرینەی لایەنەکان، دواخستنی ڕیفراندۆم لە شاری کەرکووک ڕەت کرایەوە، بڕیارەکەش ھی سەرکردایەتیی سیاسیی کوردستانە، بڕیار دراوە کەرکووک لە شارەکانی دیکەی ھەرێمی کوردستان دانەبڕێت و سبەی لەگەڵ سەرجەم شارەکانی دیکەدا ڕیفراندۆمی تێدا ئەنجام دەدرێت.''

(سەلاح دەلۆ) گوتیشی: ''دواخستنی ڕیفراندۆم لە شاری کەرکووکدا زیانێکی گەورە بە بابەتی کوردستانیبوونی کەرکووک دەگەیەنێت، دواخستنی ڕیفراندۆم بێمانایە و خەڵکی کەرکووکیش ئەوەیان قبووڵ نییە، ئێستاش خەڵک و سیاسییەکانی هەرچوار پارچەی کوردستان بەدەم کەرکووکەوە هاتوون و لە خەمی ئەو شارەدان.''
kdp-