ژمارەیەک پارێزەری شاری دیاربەکر لە باکووری کوردستان بۆ چاودێریی پرۆسەی ریفراندۆمی سەربەخۆیی هەرێمی کوردستانی عێراق گەیشتنە شری هەولێر.

لە چوارجێوەی ئامادەکارییەکان بۆ ریفراندۆمی سەربەخۆیی کوردستان، حکوومەتی هەرێمی کوردستان داوای لە چەندین ناوەندی یاسایی و چاودێریی نێودەوڵەتی کردووە چاودێریی پرۆسەکە بکەن.

لەو چوارچێوەیەدا، 17 پارێزەری ئەندامی سەندیکای پارێزەرانی دیاربەکر، رۆژی شەممە 23/9/2017 گەیشتنە هەولێر و چاودێریی پرۆسەی ریفراندۆم دەکەن.

ئەمڕۆ (شەممە) پرۆسەی ریفراندۆمی سەربەخۆیی لە دەرەوەی کوردستان دەستی پێ کرد و بڕیاریشە رۆژی دووشەممە 25/9/2017، پرۆسەکە لە هەرێمی کوردستان و ناوچەکانی دەرەوەی ئیدارەی هەرێمی کوردستان، ئەنجام بدرێ.

بەپێی زانیارییەکان، کە بەرپرسانی کۆمسیۆنی باڵای سەربەخۆی هەڵبژاردن و راپرسی لە هەرێمی کوردستان بڵاوی کردوونەتەوە، ، تاوەکو ئێستا 136 چاودێری نێودەوڵەتی بۆ چاودێریکردنی ریفراندۆمی سەربەخۆیی، گەیشتوونەتە هەولێر و 140 دەزگای راگەیاندنی جیهانیش خۆیان بۆ رووماڵکردنی پرۆسەکە ناونووس کردووە.

لە کۆبوونەوەی رۆژی چوارشەممە 4/6/2017ی مەسعود بارزانی، سەرۆکی ھەرێمی کوردستان لەگەڵ نوێنەر و سەرکردەی حزب و لایەنە سیاسییەکانی کوردستان، بڕیاردرا، رۆژی ٢٥ـی ئەیلوولی 2017 ریفراندۆمی سەربەخۆیی کوردستان لە ھەرێمی کوردستان، کەرکووک و ناوچە کوردستانییەکانی دەرەوەی ئیدارەی ھەرێمی کوردستان، ئەنجام بدرێت.










باسنيوز