ژووری پارێزەرانی شاری ئەستەنبۆڵ لە تورکیا، ئەوەی ئاشکرا کرد کە حکوومەتی تورکیا لە بەرەنگاربوونەوەی ڕیفراندۆمی سەربەخۆیی هەرێمی کوردستانی عێراقدا جددی نییە.

لە ڕاگەیاندراوێکدا کە ئەمڕۆ چوارشەممە 20/9/2017 بڵاو کراوەتەوە، ژووری پارێزەرانی ئیستەنبۆڵ ڕای گەیاندووە، پرسی سەربەخۆیی هەرێمی کوردستانی عێراق بۆ تورکیا ”دەبێ هێڵی سوور بێت“. ئەوەشی ئاشکرا کردووە: ”تورکیا و حکوومەتەکەی لە شرۆڤەکردنی ڕیفراندۆمی سەربەخۆیی کوردستاندا خۆی دەدزێتەوە و شرۆڤەیەکی شەرمەزارانە دەکات“.

ژووری پارێزەرانی ئیستەنبۆڵ لە ڕوانگەی دژایەتیکردنی خۆیان بۆ ڕیفراندۆمی سەربەخۆیی، داوایان لە حکوومەتی تورکیا کردووە کە خۆیان لەم جۆرە گوتارانە بە دوور بگرن.

هاوکات ئەوەشی خستووەتە ڕوو: "پێویستە حکوومەت بۆ پاشەڕۆژی تورکیا، بێتە سەر ھێڵ و ئەو بێدەنگییەی، مانای خۆبەدەستەوەدانە".

ئەمە لە کاتێکدایە کە هەندێک لەوانەی دژایەتیی ڕیفراندۆم و سەربەخۆیی کوردستان دەکەن، هەڵوێستەکانی حکوومەتی تورکیا وەک کارتێک بۆ دژایەتیکردنەکەیان بەکار دەهێنن.









باسنيوز