سەرۆكی فراكسیۆنی یەكێتی لە ئەنجومەنی پارێزگای هەولێر، ڕای دەگەیەنێت، بۆ بانگەشەكردنی ڕیفراندۆمی سەربەخۆیی كوردستان، فەرمان بۆ ئۆرگانەكانی یەكێتی دەركراوە.

ڕێباز بێركۆتی، سەرۆكی فراكسیۆنی یەكێتی لە ئەنجومەنی پارێزگای هەولێر، بە (كوردستان 24)ی ڕاگەیاند: "لە ڕۆژی دووشەممە 18/9/2017وە كۆسرەت ڕەسووڵ، جێگری یەکەمی سکرتێری یەکێتیی نیشتمانیی کوردستان، برووسكەی بۆ ئۆرگانەكانی یەكێتی كردووە لە كەركووك، سلێمانی، هەولێر و ناوچەكانی دیكە بۆ دەستپێكردنی بانگەش بۆ ڕیفراندۆمی سەربەخۆیی هەرێمی كوردستان".

سەرۆكی فراكسیۆنی یەكێتی باس لەوەش دەكات، كە ئۆرگانەكانی یەكێتی لەگەڵ ئۆرگانی حزب و لایەنە سیاسییەكان و كەمە نەتەوایەتییەكان هەماهەنگ دەبن بۆ هاندانی لایەنگران و خەڵكی هەرێمی كوردستان، بۆ ئەوەی لە 25ی ئەیلوولدا بە (بەڵێ) دەنگ بۆ ڕیفراندۆمی سەربەخۆیی هەرێمی كوردستان بدەن.

ئەو بەرپرسە لەسەر بڕیارەكەی ئەمڕۆی ئەنجومەنی پارێزگای هەوڵێر، دەڵێت: "هەرچەندە بەپێی پەیڕەوی ناوخۆ هەموو فراكسیۆنەكان ئاگادار كرابوونەوە بەشداری كۆبوونەوەكە بكەن، بەڵام فراكسیۆنی گۆران و كۆمەڵ بەشدارییان نەكرد، هەرچەندە ئەمە پرسێكی حزبی نییە و پرسێكی نەتەوەی و نیشتمانییە بۆیە پێم وایە ئەگەر حزبیش هانی خەڵك بۆ بەشداری نەكردن بدات، خەڵك هەر بەشداری دەنگدان دەكات و دەنگ بە (بەڵێ) بۆ ڕیفرانۆدمی سەربەخۆیی دەدات"، ڕوونیشی كردەوە، بەم نزیكانە سەردانێك لە ئاستی سەرۆكایەتیی ئەنجومەنی پارێزگا سەردانی پەرلەمانی كوردستان دەكەن، هەروەها تەنسیقیان لەگەڵ دەكەن".










باسنيوز