به‌ڕێوه‌به‌رایه‌تی ئاسایشی سلێمانی رایگه‌یاند، هێزه‌كانیان به‌هاوبه‌شی له‌گه‌ڵ لیژنه‌كانی قایمقامیه‌تدا توانیویانه‌ ده‌ست به‌سه‌ر پێنج ته‌ن برنجدا بگرن كه‌ "كرمی تێدابوووه‌".

له‌راگه‌یه‌ندراوێكدا كه‌وێنه‌یه‌كی بۆخه‌ندان نێردراوه‌، ئاسایشی سلێمانی رایگه‌یاند، شه‌وی رابردوو له‌ناوی شاری سلێمانی له‌دوو گه‌ڕه‌كی جیاوازدا له‌دوو كۆگای ماڵاندا ده‌ستیانبه‌سه‌ر پێنج ته‌ن برنج-دا گرتووه‌ له‌جۆری ( سه‌نوایت ).

ئاماژه‌به‌وه‌كراوه‌، برنجه‌كه‌ به‌شێوازێكی نادروست له‌ناو كۆگای ماڵان و شوێنی نه‌شیاودا هه‌ڵگیرابوون، به‌هۆیه‌وه‌ خراپ بووه‌و كرمی كردووه‌، بۆ به‌كارهێنان نه‌شیاو بووه‌.

ئاسایش رونیكردووه‌ته‌وه‌، خاوه‌نه‌كه‌ی به‌نیازبووه‌ برنجه‌كه‌ وشك بكاته‌وه‌و دووباره‌ له‌ئاشی بداته‌وه‌، دواتر له‌ ناوكیسه‌ی تایبه‌تدا له‌بازاڕه‌كاندا بیفرۆشێته‌وه‌.

"سه‌رجه‌م برنجه‌كه‌ ده‌ستی به‌سه‌ردا گیراوه‌و خاوه‌نه‌كه‌ی ڕوو به‌ڕووی یاسا ده‌كرێته‌وه‌"، راگه‌یه‌ندراوه‌كه‌ی ئاسایش واده‌ڵێت.
xandan -