پارێزگاری کەرکووک، سکاڵای یاسایی لە دژی بەرپرسی دەزگای ڕۆشنبیری و ڕاگەیاندنی پارتی دیموکراتیی کوردستان لە کەرکووک تۆمار دەکات و بەرپرسی دەزگاکەش دەڵێت: “دەیانەوێت کەرکووک جێ بهێڵین”.

بەپێی بەڵگەنامەیەک کە وێنەیەکی دەست کەوتووە و تێیدا بنکەی پۆلیسی ئازادی لە کەرکووک، داوا لە کاوێز مەلا پەروێز، بەرپرسی دەزگای ڕۆشنبیری و ڕاگەیاندنی پارتی لە کەرکووک دەکات، لەبەردەم دادوەری لێکۆڵینەوەی کەرکووک ئامادە بێت.

لەمبارەیەوە کاوێز مەلاپەروێز ڕایگەیاند: “نەجمەدین کەریم، پارێزگاری کەرکووک، داوایەکی یاسایی لە دژ تۆمار کردووم و دەیەوێت لە دادگاکانی عێراقی دادگاییم بکات، کەیسی دادگاییەکەش پەیوەندی بە وتارێکمەوە هەیە کە لە ساڵی 2015 لە ڕۆژنامەیەکی هەولێر و دیمانەیەکی تەلەفزیۆنی لە ساڵی 2014دا کراوە”.

ئەو بەرپرسەی دەزگاکەی پارتی لە کەرکووک، پێی سەیرە کە لە کاتێکدا وتار و دیمانەکەشی بۆ کەناڵ و دەزگا میدیاییەکانی ناو هەرێمی کوردستان بووە، کەچی پارێزگاری کەرکووک “دەیەوێت بەپێی دادگاکانی عێراق دادگاییم بکەن”.

ئەوەشی نەشاردەوە: “ئەوەی کراوە، فشار دروستکردنە بۆ ئەوەی کەرکووک بەجێ بهێڵێن، جارێک بە هەڕەشە و جارێک بە هەڵدانی نارنجۆک، ئێستا ڕێگایەکی دیکەیان گرتووەتە بەر، بۆ ئەوەی ئەم شارە بەجێ بهێڵین کە ئەویش دادگایە".














باسنیوز