سه‌رله‌به‌یانی ئه‌مرۆ شه‌ممه‌ حه‌یده‌ر عه‌بادی سه‌رۆكوه‌زیرانی عێراق، له‌په‌راوێزی كۆنفرانسی میونیخ بۆ ئاسایش له‌گه‌ڵ وه‌فدێگی كۆنگرێسی ئه‌مریكادا كۆبووه‌وه‌.

به‌پێی نوسینگه‌ی‌ ڕاگه‌یاندنی سه‌رۆك وه‌زیرانی‌ عێراق، وه‌فده‌كه‌ی ئه‌مریكا به‌سه‌رۆكایه‌تی جۆن مه‌كین، سه‌رۆكی لیژنه‌ی پڕچه‌ككردن له‌كۆنگرێسی ئه‌مریكابووه‌و پێكهاتووه‌ له‌ 12 سیناتۆری هه‌ردوو پارتی كۆمارییه‌كان و دیموكراته‌كان.

ئاماژه‌به‌وه‌كراوه‌، مه‌كین و وه‌فده‌كه‌ جه‌ختیانكردووه‌ته‌وه‌ له‌سه‌ر به‌رده‌وامبوونی پشتیوانیكردنی عێراق و حكومه‌ته‌كه‌ی و فراوانتركردنی ئاسۆی هاوكاری نێوان هه‌ردوو وڵات له‌گشت بواره‌كاندا.

هه‌روه‌ها وه‌فده‌كه‌ سه‌رسامی خۆیان ده‌ربڕیوه‌ به‌و سه‌ركه‌وتنه‌ سه‌ربازییه‌ی‌ هێزه‌عێراقییه‌كان به‌ده‌ستیانهێناوه‌.

لای خۆیه‌وه‌ حه‌یده‌رعه‌بادی پێشڕه‌وی هێزه‌ عێراقییه‌كان و نزیكبوونه‌وه‌ی ته‌واوكردنی ڕزگاركردنی شاری موسڵی له‌چه‌كدارانی داعش خستۆته‌ڕوو و جه‌ختیكردۆته‌وه‌ عێراق سووره‌ له‌سه‌ر كۆتاییهێنان به‌بووونی داعش .

هه‌روه‌ها ئاماژه‌ی‌ به‌پێویستی هێزه‌ عێراقییه‌كان و ده‌زگا ئه‌منییه‌كانی‌ بۆ پشتیوانی زیاتر كردووه‌ بۆ ڕووبه‌ڕووبونه‌وه‌ی تیرۆر كه‌ هاوڵاتیانی مه‌ده‌نی عێراقی له‌شار و ناوچه‌كاندا ده‌كاته‌ ئامانج.
xandan -