ئەمڕۆ پێنج شەممە لەسۆران، ژمارەیەک لەچالاکوانانی مەدەنی و ھاووڵاتییان، دژ بە ڕاگرتنی پەخشی کەناڵە ناوخۆییەکان و گرانی نرخی ئامێرە نوێیەکە گردبوونەوەیەکی ناڕەزایی ئەنجام درا.



یونس حەمەد، ئەندامی ڕێکخەری گردبوونەوەکە، بە (باسنیوز)ی ڕاگەیاند: "ئەمڕۆ پێنج شەممە 16/2/2017 لە پارکی بولبولی سۆران، بە ئامادەبوونی ژمارەیەک لە چالاکوانانی مەدەنی، ڕێکخراوەکان و ھاووڵاتییان، گردبوونەوەیەکی ناڕەزایی دژ بە ڕاگرتنی پەخشی کەناڵە ناوخۆییەکان و گرانی نرخی ئامێری نوێکەمان، ئەنجام دا".


ئەو ئەندامەی ڕێکخەری گردبوونەوەکە، ئەوەشی خستەڕوو: "پێویستە لەو بارودۆخەی ئێستادا ژیان و گوزەرانی خەڵکی لەبەرچاو بگیرێت و ھەوڵبدرێت نرخەکان ھەرزانتر بکرێن، نەک چەند قات بەرز بکرێنەوە".


گوتیشی: "ھەر لەو گردبوونەوەیەدا لە بایاننامەیەکدا چەند خاڵێکمان ئاڕاستەی لایەنی پەیوەندیدار کرد و مۆڵەتی 10 ڕۆژیشمان داوەتە حکوومەت و کۆمپانیا، ئەگەر بەپیر داواکاریەکانمانەوە نێن، ناچارین ھەڵوێستی دیکەمان ھەبێت".
bas news -