ڕێڤەبەرێ ڕاگەھاندنا پارێزگەھا دھۆکێ، دیار کر کو شاندەکێ کۆمەڵا دوستایەتیا کوردستانێ و ژاپۆنێ، سەرەدانا پارێزگەھا دھۆکێ، کرن و د ھەڤدیتنەکێ دا بەحسێ کارێ کۆمەڵێ و پڕۆژێ وەڵاتێ ژاپۆنێ ھاتە کرن.



موسڵح عەبدولقادر، ڕێڤەبەرێ ڕاگەھاندنا پارێزگەھا دھۆکێ، بۆ (باسنیوز) ڕاگەھاند: " ئەڤرۆ چار شەمبێ15/2/2017ێ، فەرھاد ئەترۆشی پارێزگەرێ دھۆکێ، پێشوازی ل نوری ڕەشید عەلی سەرۆکێ کۆمەڵا دوستایەتیا کوردستانێ و ژاپۆنێ و شاندێ د گەل دا کر".



دیار ژی کر" د ھەڤدیتنەکێ دا سەرۆکێ کۆمەڵێ بەحسێ چاوانیا دامەزراندنا کۆمەڵا دوستایەتیا کوردستانێ و ژاپۆنێ کر و ئەو پێنگاڤێن ھاتینە ھاڤێتن و خزمەتێن ھەتا نوکە ئەنجام داین بۆ پێشڤە برنا پەیوەندی یێن کوردستانێ و ژاپۆنێ، ب ڕێکا پەیوەندی یێن خۆ شاندێن پەڕلەمانێ کوردستانێ برینە ژاپۆنێ، ئەڤ کۆمەڵە ژ 45 ئەندامان پێک دھێت د بوارێ شارەزایێن جۆراو جۆر دا، ھەروەسا ل بەرە لقەکێ ڤێ کۆمەڵێ ل پارێزگەھا دھۆکێ ڤەکەن".



ئاماژە ب وێ چەندێ ژی کر: "وەڵاتێ ژاپۆنێ ڕازی بوونا خۆ دیار کریە کو پڕۆژەکێ چاندنێ یێ پێشکەفتی ل قەزا شێخان سەر ب پارێزگەھا دھۆکێ ڤە بجھبینیت و 600 ھزار دۆلار بۆ ڤی پڕۆژەیی تەرخان کرینە و نێزیکی 24 کەسان دێ لێ کار کەن".



گوت ژی: " پارێزگەرێ دھۆکێ دەست خۆشی ل کۆمەڵا دۆستایەتیا کوردستانێ و ژاپۆنێ کر و ھیڤیا بەردەوامی و سەرکەفتنێ بۆ وان خواست، ھەروەسا بەرھەڤیا کارگێریا پارێزگەھا دھۆکێ بۆ ھەر ئاسان کاری و پشتەڤانی یەکا پێدڤی بیت بۆ سەرکەفتنا کارێ وان دوپات کر".
bas news-