ئه‌مڕۆ 100 رۆژه‌ هەردوو هاوسه‌رۆكی هه‌ده‌په‌ و 9 ئه‌ندام په‌رله‌مانی دیكه‌ی ئه‌و پارته‌ له‌لایه‌ن حكوومه‌تی توركیا ده‌ستگیر كراون، به‌و بۆنه‌یه‌وه‌ پارتی دیموكراتی گه‌لان راگه‌یه‌ندراوێكی بڵاوكرده‌وه‌ و ئیدانه‌ی حكوومه‌تی كرد.


هه‌ده‌په‌ له‌ راگه‌یاندراوه‌كه‌دا ئاماژه‌ی داوه‌ كه‌ ئه‌مڕۆ 100 رۆژه‌ هاوسه‌رۆكانی هه‌ده‌په‌ و چه‌ند ئه‌ندام په‌رله‌مانێكی دیكه‌ ده‌ستگیر كراون، بۆیه‌ ئه‌و كرده‌وه‌یه‌ی حكوومه‌ت كوده‌تایه‌كی سیاسییه‌ و له‌ 4_11_2016 به‌سه‌ر توركیایان هێنا.


راگه‌یاندراوه‌كه‌ی هه‌ده‌په‌ له‌ زۆرێك له‌ میدیاكانی توركی گرنگی پێدراوه‌ و بڵاوكراوه‌ته‌وه‌، ئه‌وان پێیان وایه‌ دانیشتنی دادگاییكردنی سه‌لاحه‌دین ده‌میرتاش هاوسه‌رۆكی هه‌ده‌په‌ كه‌وتووه‌ته‌ دوای ریفراندۆم له‌سه‌ر سیسته‌می سه‌رۆكایه‌تی، ئه‌مه‌ش ده‌ریده‌خات كه‌ نایانه‌وێت له‌ پروپاگنده‌ی ریفراندۆمدا ده‌میرتاش بێته‌ مه‌یدان و قسه‌ بكات.


هه‌ده‌په‌ پێی وایه‌ دادگاكانی توركیا بێ لایه‌ن نین، به‌ڵكو دادگایه‌كی ته‌واو سیاسیین و به‌ گوته‌ی پارتی ده‌سه‌ڵات بڕیار ده‌رده‌كه‌ن.
bas news-