بەرپرسی ناوچەی خورماتووی پارتی دیموکراتی کوردستان دەڵێ، ئەمڕۆ وەفدێكی مەرجەعی باڵای شیعە سەردانی شاری خورماتووی كرد و، لەگەڵ سەرجەم هێز و لایەن و بەرپرس و كەسایەتییەكانی شارەكە كۆبووەوە و، بڕیار درا، لیژنەیەكی بڕیاربەدەست لە سەرجەم كێشەكانی شارەكە بكۆڵێتەوە و كێشە نەتەوەیی و مەزهەبییەكان چارە بكات.

(ئەحمەد شێخ لەنگەری)، بە ماڵپەڕی‌ فەرمیی پارتی‌ دیموكراتی كوردستانی ڕاگەیاند: ''هەفتەیەك لەمەوبەر وەفدێكی عەشایەری شاری خورماتوو سەبارەت بە دۆخی شارەكە سەردانی حەوزەی عیلمییەی شیعەی كرد و لەگەڵ مەرجەعی باڵای شیعەكان، (سیستانی) كۆبووەوە. ئەمڕۆش وەفدێكی مەرجەعی باڵای شیعە سەردانی شاری خورماتووی كرد و لە باڵەخانەی قایمقامییەتی خورماتوو لەگەڵ سەرجەم هێز و لایەن و بەرپرس و كەسایەتییەكانی شارەكە كۆبووەوە.''

(شێخ لەنگەری) گوتی: ''لە كۆبوونەوەكەدا سەرلەبەری ئەو كارە نابەجێیانە خرانە بەرباس، کە چەند ساڵێكە لەلایەن گرووپە توركمانییە شیعەكانەوە دەكرێن و، داوای چاركردنیان كرا. وەفدەکەی شیعەش قسەی باش و خێریان پێ بوو، باسیان لە برایەتیی كورد و شیعە كرد و، پێداگرییان کرد، کە ئەو برایەتییە زیندوو بكرێتەوە.''

سەبارەت بە ئەنجامی كۆبوونەوەكە، (شێخ لەنگەری) ئاشكرای كرد: ''لە كۆتایی كۆبوونەوەكەدا گەیشتینە ئەو ئەنجامەی لیژنەیەكی بڕیاربەدەست لە شارەكەدا پێك بهێنرێت، بۆ ئەوەی لیژنەیەكی دیکە دروست بكات، ئەو لیژنەیەش لە سەرجەم كەموكورتی و كێشەكانی شارەكە بكۆڵێتەوە و كێشە نەتەوەیی و مەزهەبییەكانی شارەكە چارە بكات. وەفدەكەش بەڵێنیان دا، جارێكی تر ڕێ نادەن شەڕ و ئاڵۆزی لە شارەكەدا دروست ببێتەوە.''

بەرپرسی ناوچەی خورماتووی پارتی ئاماژەیشی دا: ''ئێستا دۆخی شارەكە هەروەكو خۆی ئاڵۆزە و، كوردانی خورماتوو وردەوردە شارەكە بەجێ دێڵن و ڕفاندن و كوشتن و هەڕەشە و تیرۆر بەردەوامە. میلیشیاكانیش هەر خەریكی خۆقایمكردن و ساتر دانانن. ئێمەش چاوەڕوانین بزانین ئەم هەوڵانە بەكوێ دەگات.''
kdp-