ئەندامێکی لیژنەی شارەوانی لە پەرلەمانی کوردستان دەڵێت، سەرۆکی حکومەتی ھەرێمی کوردستان بڕیاری دابەشکردنی زەوی داوە، بەڵام پێویستە لایەنە پەیوەندیدارەکان ھاوکاری وەزارەتی شارەوانی بکەن، بۆ ئەوەی پرۆسەکە بەخێرایی بەرێوەبچێت.



ئەندامی لیژنەی شارەوانی لە پەرلەمانی کوردستان سیراج خەیلانی بە ئاژانسی ھەواڵی زاگرۆسی راگەیاند: "پرۆسەی دابەشکردنی زەوی تاوەکو ئێستا لە قۆناغی کۆکردنەوەی داتا و ئاماری ناوی کرێنشینانانه و وەزارەتەکانیش وەکو پێویست ھاوکاری وەزارەتی شارەوانی ناکەن، چونکە لیستی ناوەکان بە تێکەڵ و پێکەڵی رەوانە دەکات ئەمەش وادەکات زۆر بخایەنێت بۆ پێداچوونەوەی بەناوەکان و کاتی دەوێت."



وتیشی: سەرۆکی حکومەتی ھەرێمی کوردستان بڕیاری دابەشکردنی زەوی داوە بەسەر ھەژار و کرێنشینان و پاشگەزبوونەوەی لێ نیە، بەڵام پێویستە لایەنە پەیوەندیدارەکان ھاوکار بن بۆ ئەوەی پرۆسەکە بە خێرایی بەڕێوەبچێت و زوو زەوی دابەش بکرێت.



سیراج خەیلانی ڕوونیشی کردەوە: پرۆسەکە ھەر چەندە بەردەوامە، بەڵام من وەکو چاودێرێک لەو پرۆسەیە بە دڵم نیە، چونکە وەزارەتەکان وەکو پێویست ھاوکاری وەزارەتی شارەوانی ناکەن، بۆ ئەوەی داتا و ئاماری پێویستیان پێ بدەن و بتوانن لە ماوەیەکی کەم کارەکانیان تەواو بکەن، بۆیە لەئێستادا وەزارەتی شارەوانی بەدەست وەزارەتەکانی دیکە دەناڵێنێت و ھەندێک وەزارەت ھەیە تاوەکو ئێستا لیستی ناوەکانیان رەوانە نەکردووە.



بەپێی زانیاریەکانیش تاوەکو ئێستا ٣١٠ھەزار فۆڕم لەلایەن خەڵکی ھەژار و کەمدەرامەت بۆ وەرگرتنی زەوی پڕکراونەتەوە.
payamner-