به‌ڕێوه‌به‌رایه‌تى پۆلیسی پارێزگاى سلێمانى ده‌ستگیركردنى 13 كه‌سى به‌ تۆمه‌تى دزیى جۆراوجۆرى له‌ شارى سلێمانى، ڕاگه‌یاند.



به‌پێى ڕاگه‌یه‌ندراوێكى به‌ڕێوه‌به‌رایه‌تى پۆلیسی سلێمانى، كه‌ له‌ هه‌ژمارى به‌ڕێوه‌به‌رایه‌تییه‌كه‌ له‌ تۆڕى كۆمه‌ڵایه‌تى فه‌یسبووك بڵاوكراوه‌ته‌وه‌ :" له‌لایه‌ن به‌شی پۆلیسی نه‌هێشتنى تاوانى سلێمانى له‌ گه‌ڕه‌ك و كۆڵان و ناوبازاڕى شارى سلێمانى توانراوه‌ 13 تۆمه‌تبار به‌تۆمه‌تى دزیی جۆراوجۆر ده‌ستگیر بكرێن و هه‌مووشیان دانیان به‌تاوانه‌كانیاندا ناوه‌".



به‌پێى ڕاگه‌یه‌ندراوه‌كه‌ " دوو تۆمه‌تبارى سواڵكه‌ر (قه‌ره‌ج) به‌ناوى سواڵه‌وه‌ چوونه‌ته‌ سه‌ر ماڵان و دزییان كردووه‌ و 3 تۆمه‌تبار كه‌ دووانیان ئافره‌تن له‌ناو بازاڕدا كارى گیرفان بڕینیان كردووه‌ و 2 تۆمه‌تباریش جامى ئۆتۆمبێلیان شكاندووه‌ و كارى دزییان ئه‌نجامداوه‌ و 2 تۆمه‌تبارى دیكه‌ له‌ ماركێتدا دزییان كردووه‌ و 2 تۆمه‌تباریش مۆلیده‌ى كاره‌بایان دزیوه‌".



له‌ ڕاگه‌یه‌ندراوه‌كه‌دا ئاماژه‌ به‌وه‌شدراوه‌ " 2 تۆمه‌تباریش پلانیان داناوه‌ بچنه‌ سه‌ر ماڵان، به‌ڵام پێشتر له‌لایه‌ن هێزه‌كانى پۆلیسی پارێزگاى سلێمانییه‌وه‌ پلانه‌كه‌یان ئاشكراكراوه‌ و ده‌ستگیركراون".


bas news -