سەرۆكی ئەنجوومەنی نیشتیمانیی كورد لە سووریا ڕایگەیاند، ھەموو ئامادەكارییەك كراوە بۆ بەشداریكردنی ئەنجوومەنی نیشتیمانیی كورد لە كۆنگرەی جنێف لەبارەی رەوشی سووریاوە. پەیوەست بە داواكاریی كوردیش لەو كۆنگرەیەدا دەڵێ: "ئێمە لە سەرەتای شۆڕشی گەلانی سووریا تا ئێستایش ھەر دیموكراتیمان بۆ سووریا و فیدڕاڵییشمان بۆ رۆژئاوای كوردستان دەوێ".



(ئیبراھیم برۆ)، بە ماڵپەڕی فەرمیی پارتی دیموكراتی كوردستانی راگەیاند: "ئەنجوومەنی نیشتیمانیی كورد لە سووریا بەشداری لە ھەموو كۆنگرە و كۆبوونەوەیەكی نێودەوڵەتی لەبارەی رەوشی سووریاوە دەكات و لە ئێستادا خۆمان ئامادە كردووە بۆ بەشداریكردن لە كۆنگرەی جنێف، چونكە كۆنگرەی جنێف یەك لە ساڵی ٢٠١٤ بەڕێوە چوو و ئێمە بەشدار بووین، دواتر كۆنگرەكانی دیكەی جنێف و ئاستانا بەڕێوە چوون، بڕیار بوو لە سەرەتای مانگی شوبات بەڕێوە بچێت، بەڵام رووسیا ئاشكرای كرد كە لە كۆتایی ئەم مانگە و سەرەتای مانگی ئاداردا بەڕێوە دەچێت، دواتر (دیموسترا) پشتڕاستی كردەوە كە لە ٢٠ـی شوبات بەڕێوە دەچێت".



لەبارەی داواكاریی كورد لە رۆژئاوای كوردستان، (برۆ) دەڵێ: "پێشتر لە ھەولێر و دھۆك لەگەڵ پەیەدە گەییشتووینەتە رێككەوتن و داواكاریی كورد لە سووریا دیموكراتی بۆ سووریا و فیدڕاڵی بۆ رۆژئاوای كوردستانە، بەڵام پەیەدە لەو پڕۆژەیەدا پەشیمان بووەتەوە لەو ھەڵوێستەی خۆی، تەنیا ئێمە وەك لایەنەكانی نێو ئەنجوومەنی نیشتیمانیی كوردی جیددین لە ھەڵوێستی خۆمان لە ھەموو دیدار و دانوستانەكانیشماندا ھەر ئەوەمان دووپات كردووەتەوە، سووریایەكی دیموكرات بۆ ھەمووان و ھەرێمێكی فیدڕاڵی بۆ كورد".
KDP-