دوای بڵاوبوونەوەی دەنگۆی ئەوەی كە ھەندێك لە فراكسیۆنەكان لەوانە "گۆڕان" بەنیازن سكاڵا لەسەر حكوومەتی ھەرێمی كوردستان تۆمار بكەن لە بەرانبەر پابەندنەبوونی حكوومەتی ھەرێم بە یاسای بوودجەی ٢٠١٧ــوە، سەرۆكی فراكسیۆنی پارتی دیموكراتی كوردستان لە ئەنجوومەنی نوێنەرانی عێراق دەڵێت، ھەرچی لە دەستیان دێت با كەمتەرخەمی نەكەن وسكاڵا تۆمار بكەن.



(خەسرۆ گۆران)، بە ماڵپەری فەرمیی پارتی دیموكراتی كوردستانی راگەیاند: "گەر ئەوان بەنیازی ئەوەن سكاڵا لەسەر حكوومەتی ھەرێم تۆمار بكەن، ھەر چی لە دەستیان دێت با بیكەن و كەمتەرخەمی نەكەن، چونكە ناتوانن ھەرێمی كوردستان ناچار بكەن پابەندی ئەو یاسایە بێت".



سەرۆكی فراكسیۆنی پارتی دیموكراتی كوردستان گوتیشی، سكاڵاكە ھیچ ئەنجامێكی نابێت، لەبەر ئەوەی رێككەوتن لە نێوان ھەرێم و بەغدا ھەیە و رێككەوتنەكە جێبەجێ نەكراوە و پێویستە دووبارە دانیشتن بكرێت و رێككەوتنی تازە بكرێت.

(گۆران) زیاتر گوتی، ئەگەر باسی یاسا دەكەن بۆ سكاڵا لەسەر (نووری مالیكی) تۆمار ناكەن كە لە ساڵی ٢٠١٤ـدا عێراق بوودجەی نەبوو و بە بێ بوودجە بەڕێوە چوو.
KDP-