مامۆستایەكی زانستە سیاسییەكان دەڵێ، ئەو پڕۆژەیەی (ئاشتەوایی مێژوویی هاوپەیمانیی شیعەكان) كە زیاتر لەلایەن ئەنجوومەنی باڵای ئیسلامی بە سەركردایەتیی (عەممار حەكیم) ئامادە كراوە، هیچ وشەیەكی تێدا نییە كورد دڵی پێ خۆش بكات، بەڵكوو بۆ لەباربردنی پرسی سەربەخۆییی كوردستانە. باوەڕیشی وایە، پڕۆژەکەی هاوپەیمانیی شیعەكان سەر ناگرێ و، وەک ڕابردوو شكست دەبات.

(عومەر نوورەدینی)، بە ماڵپەڕی فەرمیی پارتی دیموكراتی كوردستانی ڕاگەیاند: "سوننەكان و شیعەكان هەر یەكێكیان بەڵگەنامەی خۆیان هەیە، هەردوو بەڵگەنامەی بەناو ئاشتەوایی نیشتیمانیی مێژوویی شیعەكان و سوننەكان، ئامانجی سەرەكی تێیاندا ئەوەیە، كە عێراق بە یەكپارچەیی بهێڵنەوە و ڕێ بگرن لە پارچەبوون و دابەشبوونی، بەو ناوەیشەوە دەیانەوێ ڕێگا لە سەربەخۆییی سیاسی و ئابووریی هەرێمی كوردستان بگرن، ئەمە یەكێك لە ئامانجەكانیانە، بەڵام ئایا سەر دەگرێ یان نا ئەمە بابەتێكی ترە. هەردوو دۆكیومێنتەكە جەخت لەسەر ئەوە دەكەنەوە، عێراق دابەش نەبێت، خۆ دیارە مەبەستیان كێیە كە دابەشی نەكات، هەڵبەت مەبەستیان كوردە."

وەک ئەو مامۆستایەی زانستە سیاسییەكان دەڵێ، ئامانجێكی تری پڕۆژەکەیان ئەوەیە كە پشت لە واقیعی سیاسی ئێستای عێراق بكەن لەسەر بنەمای فیدڕاڵییەت و پرەنسیپی بەشداریكردن، خۆی كورد هەندێك پۆستی سیادی هەبوو، ئەوان دەڵێن لەسەر ئیستیحقاقی سیاسیی خۆیان دەبێت ئەوە بكرێت، ئیستحقاقی سیاسیی شیعەكان ئەوەیە كە زۆرینەن لە نێو پەرلەمان و حكوومەتیش، خۆی ئەوان دەتوانن بە تەنیایش حكوومەت پێك بهێنن، واتا لە بەرانبەر پرەنسیپی بەشداریكردندا و لەناو نەخشەی سیاسیی دۆكیومێنتەكەی ئەواندا، پرەنسیپی زۆرینە هێنراوەتە پێشەوە، كە ئەوەیش پێگەی خۆیان و بەرژەوەندیی خۆیانی پێ بەهێز دەكات.

(نوورەددینی) وا باس دەکات کە زۆر بە وردی پڕۆژەکەیانی خوێندووەتەوە، دەشڵێ "لە هەموو دۆكیومێنتەكەی شیعەكاندا یەك جاریش وشەی هەرێمی كوردستان و مافەكانی كوردستان بەكار نەهاتووە، بۆیە جگە لەوە باسی بابەتی ئەوەی تێدایە كە پرسی نەوت و داهات و دیپلۆماسیەت و عیلاقاتی دەرەوە بەمەركەزی بكرێن، كە هەموو ئەوانە بۆ بچووككردنەوەی هەرێمی كوردستانە".

(عومەر نوورەدینی) جەخت دەکاتەوە: "ئەمانە هەموو باس و دۆكیومێنت و ڕای شیعەكانە لە باری واقیعیدا، بۆیە ئەم پڕۆژەیە سەر ناگرێ، وەك چۆن لە ڕابردوودا شكستی بردووە، ئێستایش هەر شكست دەبات، بەڵام ئەمە دەرهاویشتەی وەرەقەی بەڵگەنامەی ئاشتەوایی و مێژوویی و نیشتیمانیی شیعەكانە كە لەناویدا فكر و عەقڵییەتێكی سیاسی دەخوێنرێتەوە، خوێندنەوەیەک کە، ڕێگر بێـت لە سەربەخۆییی كوردستان لە رووی سیاسی و ئابوورییەوە. هەروەها دەیەوێ ئەزموون و باڵادەستیی سیاسیی شیعە لە عێراقدا بێنێتە ئاراوە. دواجار هەرێمی كوردستان بچووك بكاتەوە."

ئەو مامۆستایەی زانستە سیاسییەکان بەپیویستی دەزانێ، کە وەک چۆن شیعەكان و سوننەكان وەرەقە و بەڵگەنامەی سیاسیی خۆیان هەیە، پێویستە كوردیش هەیبێـت و تێیدا ئەم دۆكیۆمێنت و گەڵاڵەنامە سیاسییەی كوردیش بیروبۆچوونەكانی خۆی و ڕوئیا و پرەنسیپی خۆی لە ناودا ڕێك بخات و، نیشانی بدات و هاوهەڵوێستیی سیاسیی خۆی دیاری بكات، میكانیزمیش بۆ ئامادەكردنی ئەم بەڵگەنامە كوردستانییە بریتییە لەوەی كە لیژنەیەكی هاوبەش لە نێوان لایەنە سیاسییەكان دروست ببێت.

ئەو مامۆستایەی زانکۆ زیاتر هەڵوەستە لە نێوەرۆکی پڕۆژەکە دەکات و گوتی: "دوای خوێندنەوەی ئەو پڕۆژەیەی (ئاشتەوایی مێژووییی هاوپەیمانیی شیعەكان) كە زیاتر لەلایەن ئەنجوومەنی باڵای ئیسلامی بە سەركردایەتیی (عەممار حەكیم) ئامادە كراوە، لە واقیعەكەیدا ئەوەی دیارە ئەوە بوو، ئامانجە سەرەكییەكانی بریتیە لە پێشگرتن لە زیاتر سەربەخۆییی سیاسی و ئابووریی هەرێمی كوردستان.. لە (دەروازەی پڕۆژەكە) و لە خاڵی دووەمدا ئەوە هاتووە كە ئامانجی سەرەكیی پڕۆژەكە، پاراستنی عێراق و هیشتنەوەیەتی بە یەكگرتوویی، هەروەها لە بەشی (ئاشتەوایی نیشتیمانی)ـدا و لە خاڵی سێیەمدا باسی زەروورەتی تەسوییە و ئاشتەوایی كراوە لە پێناو ڕووبەڕووبوونەوەی تیرۆر و دابەشنەبوون! سەیر لێرەدا ئەوەیە، دابەشبوونیان خستووەتە خانەی تاوان و حوكمی تیرۆر! هەروەها لە خاڵی شەشەمدا بە ناوی (بنەما جێگیرەكانی ئاشتی) و لە بڕگەكانی (١ و١٣ و ١٧) زۆر بە ڕوونی پێداگری لەسەر یەكگرتووییی عێراق و ڕەتكردنەوەی دابەشبوونی كراوە. هەروەها دۆكیومێنتەكە بە ناوی دژایەتیی بەشبەشانێی تائیفی و نەتەوەیی و مەزهەبی، داوای ئیستیحقاقی سیاسی دەكات، مانای ئەمە ئەوەیە، پشت لە مەبەدەئی بەشداریكردن لە دەسەڵاتی سیاسی بكرێ و كار بە زۆرینەی سیاسی بكرێ، ئەمەش وا دەكات كە یاسا و بڕیارەكان و حوكمڕانەتی و مومارەسەی دەسەڵات بكەوێتە ژێر هەژموون و خواست و ویستی زۆرینەی شیعە و، لەمەشدا كورد و سوننە و توركمان و مەسیحییەكان زیانیان پێ دەگات".

ئاماژەیشی دا، هەموو بەڵگەنامەكە گەڕاوە شتێكم تێدا نەدۆزیوەتەوە كە لە بەرژەوەندیی هەرێمی كوردستان بێت و دڵی خۆی پێ خۆش بكات، هۆشدارییشی دا "پێدەچێ لە دوای كەمبوونەوەی مەترسیی سەربازی و ئەمنیی داعش، وەك گەل و قەوارەی سیاسیی هەرێمی كوردستان ڕووبەڕووی هەڕەشە و مەترسیی دیكە ببینەوە!".
KDP-