سەرچاوەیەک لە ئەنەکەسە ئاشکرایکرد، لەو ھێزەی بڕیارە بۆ رۆژئاوای کوردستان دروست بکرێت وەجبەی یەکەم دەستیان بە مەشق و راھێنان کردووە و وەجبەی دوەمیش ئامادەیە و ئەمەریکاش مەشق و راھێنانیان پێدەکات.

ئەو سەرچاوەیە کە پێی باش نەبوو ناوی ببرێت رایگەیاند: "ناونووسکردن بۆ دروستکردنی ھێزێکی ١٠ھەزار کەسی بۆ رۆژئاوای کوردستان بەردەوامە و خەڵکێکی زۆر باش پێشوازی لێدەکات و خۆی ناونووس دەکات و لەئێستادا وەجبەی یەکەم کە ژمارەیان ھەزار کەسە لە پێشخابوور دەستیان کردووە بە مەشق و راھێنان."

ئەو سەرچاوەیە گوتی: وەجبەی دووەمیش ئامادەیە و کاری ناونووسکردنیان تەواو بووە و دوای وەجبەی یەکەم ئەوانیش دەست بەمەشق و راھێنان دەکەن.

ھەروەھا ڕوونیشی کردەوە، ئەمەریکا خۆی مەشق و راھێنان بەو پێشمەرگانە دەکات و پشتگیریان دەکەن.

ئەوەشی خستەڕوو، تاوەکو ئێستا چەند ھەزار کەسێک ناوی خۆی نووسیووە بۆ ئەوەی بچێتە ریزی ئەو ھێزەوە و ناونووسکردنیش بەردەوام دەبێت و وادەیەکی دیاریکراو نیە بۆ ناونووسکردن.

دروست کردنی ئەو ھێزە بە ھاوکاری ھاوپەیمانانە و خۆیان پێداویستیان بۆ دابین دەکەن و گەڕانەوەشیان بۆ رۆژئاوای کوردستان لەژێر چاودێری ھاوپەیمانان دەبێت.














ZNA