له‌ دیداریدا لەگه‌ڵ ئەنجوومەنی كورد له‌ سووریا، سەرۆكی هەرێمی كوردستان باسی لە هەڕەشەكان هزری توندڕۆیی و تیرۆر كرد و رایگه‌یاند، كە جیهان بۆ تێكشكاندنی تیرۆر و لەناوبردنی هزری تیرۆر پێویستی بە گەلی كوردستانە. هاوكات هەڵوێست و خۆڕاگریی پارتە سیاسییەكانی ناو ئەنجوومەنی كوردی سووریا به‌ گرینگ وه‌سف كرد و رایگه‌یاند، بڕیار و داهاتووی كورد لە سووریا لە دەستی ئەوانە دەبێت كە نەهجێكی ڕاستیان هەیە و، لە ئاراستەی بەرژەوەندییە نەتەوەییەكانی گەلی كورد هەنگاو دەنێن.

ئه‌مڕۆ سێشەممە 31ـی 1ـی 2017، لە سەلاحەددین، (مەسعوود بارزانی) سەرۆكی هەرێمی كوردستان، پێشوازی لە سەرۆكی ئەنجوومەنی كوردی سووریا و سكرتێر و نوێنەرانی پارتە سیاسییەكانی ناو ئەنجوومەنی كوردی سووریا كرد.

لە دیدارەكەدا شاندی میوان باسیان لە گفتوگۆ و دانیشتنەكانی ئاستانە لە وڵاتی كازاخستان و هەڵوێستی لایەنە بەشداربووەكانی ئەو گفتوگۆیانە لەبارەی ئاییندەی سووریا كرد. ڕۆشناییشیان خستەسەر چالاكییە سیاسی و دیپلۆماسییەكانی ئەنجوومەنی كوردی سووریا بۆ بەرگریكردن لە داوا ڕەواكانی گەلی كورد لە سووریا.

هەروەها سوپاس و پێزانینی خۆیان ئاراستەی (سەرۆك بارزانی) كرد لە پشتیوانیكردنی هێزە ڕەسەن و نیشتیمانپەروەرەكانی كورد لە سووریا و داوایان كرد (سەرۆك بارزانی) بەرچاوڕوونی و ئامۆژگارییەكانی خۆی لەمەڕ پێشهاتەكانی سووریا و داهاتووی كورد لە سووریا و ناوچەكە بخاتەڕوو.

لەبەرانبەردا (سەرۆك بارزانی) پێزانینی خۆی بۆ هەڵوێست و خۆڕاگریی پارتە سیاسییەكانی ناو ئەنجوومەنی كوردی سووریا نیشان دا و جەختی كردەوە، بڕیار و داهاتووی كورد لە سووریا لە دەستی ئەوانە دەبێت كە نەهجێكی ڕاستیان هەیە و، لە ئاراستەی بەرژەوەندییە نەتەوەییەكانی گەلی كورد هەنگاو دەنێن. ئەوەیشی خستەڕوو كە بە هەموو توانایەك پاڵپشتی داوا و مافەكانی گەلی كوردە لە سووریا و هەرێمی كوردستانیش وەك ماڵ و پشتیوانی خوشك و برایانی كورد لە سووریا دەمێنێتەوە.

هەر لەو كۆبوونەوەیەدا (سەرۆك بارزانی) وتەیەكی لەبارەی سەربەخۆییی كوردستان و بارودۆخی سیاسیی ناوچەكە و ڕوانگای وڵاتان لەبارەی گەلی كوردستان و پێشمەرگە و ئەگەر و پێشهاتە سیاسییەكانی سووریا پێشكەش كرد.
لە میانەی وتەكەیدا (سەرۆك بارزانی) باسی لە هەڕەشەكان هزری توندڕۆیی و تیرۆر كرد و ئەوەیشی خستەڕوو، كە جیهان بۆ تێكشكاندنی تیرۆر و لەناوبردنی هزری تیرۆر پێویستی بە گەلی كوردستانە.
هەروەها وێڕای ئاماژەدان بە شەڕی تاییفی، دووپاتی كردەوە، كە كوردستان هەرگیز نابێتە بەشێك لەو شەڕە تاییفییەی كە لە ناوچەكەدا لە ئارادایە و ئەو ململانێیە بووەتە بەڵا بۆ ئاساییشی ناوچەكە و جیهان.








KDP