فەرماندەیەکی هێزی پێشمەرگە ئەندامانی پارتی کرێکارانی کوردستان بە پێشێلکردنی مافی ئێزدییەکان تۆمەتبار دەکات.
بە پێێ هەواڵێکی سایتی (کوردپارێز)ی ئێرانی، قاسم شەشۆ فەرماندەی هێزی پێشمەرگە لە شنگال ڕایگەیاندووە کە لەئەنجامی لێکۆڵینەوەی ئیدارەی شنگال و فەرماندەیی پێشمەرگە لە شنگال دەرکەوتووە کە زۆربەی تاوانەکانی کوشتن و ڕفاندن لە ناوچەی شنگال لەلایەن ئەندامانی پەکەکەوە ئەنجام دراوە.
ناوبراو، تیرۆر و کوشتنەکانی چەند مانگی ڕابردووی پەکەکە و دەیان نموونەی ڕفاندنی هاووڵاتییانی دیکەی بۆ ئامانجی سەرەکیی پەکەکە لە نانەوەی ئاژاوە لە شنگال و ناوچەکانی دەوروبەری گەڕاندەوە.
وەک سەرچاوەکە باسی کردووە، فەرماندەکەی کوردانی ئێزدی جەختی لەسەر ئەوە کردووەتەوە کە پێشێلکارییەکانی پەکەکە لەدژی ئێزدییەکان بەردەوامە و ئەوان چیدیکە قبووڵی ناکەن و هەڵوێستی جددییان دەبێت.
لەو ڕووەوە داوای لە سەرجەم کوردانی ئێزدی کرد بێدەنگ نەبن بەرامبەر ئەو سووکایەتییانەی کە لەلایەن پەکەکەوە دەرهەق بە خوێنی هاووڵاتییانی بێتاوان و هێزەکانی پێشمەرگە دەکرێت.
بەرپرسە سەربازییەکەی شنگال لە لێدوانەکەیدا ویڕای ئاماژە بە دیارنەمانی چارەنووسی ڕفێندراوەکان لەلایەن پەکەکەوە، دەڵێت لەوانەیە بتوانرێت کچان و کوڕانی ئێزدیی دیلی دەستی داعش بە پارە یان بەشێوازی دیکە ڕزگار بکرێن، بەڵام ڕفێندراوانی دەستی پەکەکە لەلایەن ئەو رێکخراوەوە بۆ هەمیشە لە خانەوادە و کەسوکاریان دوور دەخرێنەوە .
payamner -