نۆژدارەکی زاخۆ دلەکی دەستکرد داھێنایە
نۆژدارێ داھێنەر (ئازاد ئیبراھیم نەجاڕ) ڕاگەھاند: "بیرۆکەیا داھێنانا (دلێ دەستکرد) ھینگێ ل دەف من پەیدا بوو، دەمێ کو من دیتی ھندەک نۆژدارێن ئەمریکی (دلەکێ دەستکرد) یێ چێکری، لێ نە دلەکێ باش و سەرکەفتی بوو کو بشێت خزمەتا مرۆڤان بکەت، لەوما من ھزر ل وێ چەندێ کر کو ئەز ڤی کاری ئەنجام بدەم و بشێم دلەکی زۆر باشتر چێکەم کو سەرکەفتنێ بینیت، ل ساڵا (1999)ێ من دەست ب ڤی پڕۆژەیی کر و ھەتا نۆکە یێ بەردەوامم. (%90)ێ پڕۆژە جێ بە جێ بوویە، ھەستەکێ خۆش و جھێ شانازیێ یە کو من وەکو کوردەک شیایی ڤێ داھێنانێ ئەنجام بدەم".
نۆژدارێ داھێنەر، دیار ژی کر: "ئەڤ دلێ دەستکرد ژ ماددێ (تیتانیۆم) ھاتیە چێکرن، کو ماددەیەکێ سڤک و موکمە، کێشا وێ (800) گڕامە، و ژ دوو پارچێن سەرەکی پێک دھێت، پارچا ئێکێ ڕێکا ھاتن و چوونا خوینێ یە و پارچا دووێ جھێ پەمپەکا بچیکە کو کارێ وێ پاڵدانا خوینێ یە و دشێت بۆ ماوێ (3) ساڵان کارێ خۆ ب دروستی و بێ کێشە ئەنجام بدەت، پشتی ھینگێ ئەڤ پەمپە ب نەشتەرگەریەکێ د ماوێ (20) خولەکان دا دێ ھێتە گۆھۆڕین، ھەتا نۆکە من (11) دانە ژ ڤی دلی چێکرینە و (5) ملیون دولار لێ ھاتینە مەزاختن و بھایێ ھەر دلەکێ ژی دێ (120) ھزار دۆلار بن، من (6) تاقیکرن ل سەر گیانەوەران ئەنجام داینە و ھەمی ژی (%100)ێ سەرکەفتی بووینە".
(ئازاد ئیبراھیم) ئاماژە ب وێ چەندێ ژی دا: "ب ئانەھیا خودێ ل دوماھیا ئەڤ ساڵە، بۆ ئێکەم جار دێ چیتە د لەشێ مرۆڤی دا، ئەڤ دلە دێ خزمەتا وان نەخۆشان کەت، یێن کو نەخۆشی یا وەستیانا دلی ھەین، کو ئەڤ جورێن نەخۆشان نەشێن گەلەک بڕێڤە بچن و ل جھێن بلند سەر بکەڤن، چونکی زووی دوەستن و دەمێ دنڤن ژی ھەناسا وان تەنگ دبیت، ئەگەر بۆ ماوێ ساڵەکێ چارەسەری یا وان نە ھێتە کرن، گیانێ خۆ ژ دەست ددەن، لەوما ئەڤ دلە دێ ژیانا ھزارەھا ڤان جورێن نەخۆشان ژ مرنێ ڕزگار کەت".
ناڤبری، گوت ژی: "لیژنا خەلاتێ (نۆبل) ل باژێڕێ (ستۆکۆھڵم) ئاگەھداری پڕۆژێ من بوون و ئەز وەکو بەربژێر بۆ خەلاتێ (نۆبل) ھەلبژارتم، من ئەڤ داھێنان نە ژ بۆ مەرەما ب دەستڤەئینانا چ خەلاتان چێکری یە، بەلکو من یا ژ بەر خزمەتا مرۆڤایەتیێ چێکری، ھەر دەمژمێرەکا مرۆڤەک ب ڤی دلێ من چێکری بژیت، بۆ من ژ ھەمی خەلاتێن جیھانێ مەزن تر و خۆش ترە، و خەونا منە کو ڕۆژەک بھێت ئەز ڤێ داھێنانا خۆ ببەمە کوردستانێ و وەکو پێشمەرگەیی خزمەتا گەل و وەڵاتێ خۆ بکەم".
باسنیوز
