حکوومەتی عێراق ژمارەی ئاوارەکانی شاری مووسڵ، کە بەهۆی ئۆپەراسیۆنی رزگارکردنەوەی مووسڵ ئاوارە بوون، ئاشکرا دەکات.



رۆژی چوارشەممە 28ـی کانوونی یەکەمی 2016، دەرباز محەمەد، وەزیری کۆچ و کۆچپێکراوانی حکوومەتی عێراق لە بەیاننامەیەکدا رایگەیاندووە، کە 120 هەزار ئاوارەی شاری مووسڵ و دەوروبەری لە کەمپەکان نیشتەجێ کراون.



دەرباز محەمەد هەروەها رایگەیاندووە، کە لەسەرەتای ئۆپەراسیۆنی رزگارکردنەوەی مووسڵەوە، 137 هەزار کەس لە شاری مووسڵ و شارۆچکەی حەویجەوە ئاوارە بوون.



ئەو ئاوارانە بەهۆی دڵنیابوونیان لە پاراستنی مافەکانیان، پەنایان بۆ هێزەکانی پێشمەرگەی کوردستان هێناوە و لە کەمپەکانی هەردوو پارێزگای هەولێر و دهۆک نیشتەجێ کراون.



ئاوارەکانیش باس لەوە دەکەن، کە تەنها دەزگای خێرخوازیی بارزانی و حکوومەتی هەرێمی کوردستان هاوکارییان دەکەن.



لە رۆژی 17ـی تشرینی یەکەمی 2016ـەوە ئۆپەراسیۆنی هاوبەشی هێزەکانی پێشمەرگە و هێزە عێراقییەکان بۆ رزگار کردنەوەی مووسڵ دەستی پێکردووە.



لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.








باسنيوز