نوونەرێن کوردێن ئێزدی ل پەرلەمانێ کوردستانێ، دیارکر پرۆژە یاسایەک ھەیە ل پەرلەمانێ ئیتالیا و نۆکە ئەندامێن پەرلەمانێ ئیتالیا، ل سەر کار ل وەختەکێ نێزیک بریارێ ل سەر دانپێدانا جینۆسایدا کوردێن ئێزدی بدەن، دووڤ گوتنا قونسلی گشتی وەلاتی ئیتالیا ل کوردستانێ.



ئەڤرۆ 27/12/2016 شێخ شاموو، نوونەرێ کوردێن ئێزدی ل پەرلەمانێ کوردستانێ و سەرۆکێ دەستەیا بلندا بنگەھێ لالش ل دھوکێ بۆ (باسنیوز) دیارکر: "پەیاما دەرد و داخوازیێن ئێزدیان تایبەت پشتی کارەساتا شنگالێ و وان زەرەر و زیانێن و زۆرداریا ل کوردێن ئێزدی ھاتیە کرن ب شێوەیەکێ گشتی گەھاند و چەند داخوازی ژ کۆنسلا وەلاتێ ئیتالیا کرن، ژوانا بەردەوام بن ل سەر ھاریکاریکرنا خەلکێ مە ب تایبەت یێن ژ دەستێ داعشێ رزگار دبن ژلایێ ساخلەمیێ ڤە و چارەسەریا وان و بەردەوامیێ بدەنە وان پرۆژێن خۆ یێن بۆ خووندنێ و ھاریکاریێن مرۆڤی و سەرما زڤستانێ و گەرما ھاڤینێ کو دۆم درێژبوویە و درەوشەکا پەریشان دانە".


شێخ شامو، خۆیا ژی کر: "کو داخواز ھاتە کرن بۆ ئاڤەدانکرنا دەڤەرێن ئێزدیان یێن ھاتینە داگیرکرن ب تایبەت شنگال و سنوون و باشیک و بەحزانێ کو پشتی وێ داگیرکرنێ ژێرخانا وان یا ئابووری تارادەیەکێ زۆر لاواز بوویە و نەمایە ، ئەڤ ئاڤەدانکرن نە دشیانێن حکوومەتا ھەرێما کوردستانێ دانە و دڤیا وەلاتێن مینا ئیتالیا و ئێکەتیا ئەوروپی ب شێوەیەکێ گشتی پشتگیریێ بکەن بۆ ڤەگەراندنا ژیانێ بۆ ڤان دەڤەران".


نوونەرێ کوردێن ئێزدی گۆتژی: "داخواز ژ کۆنسلێ ھاتە کرن پشتگیریا کەیسا جینۆساید ناساندنا کارەساتا ئێزدیان ل شنگالێ بکەن ب تایبەتی ل سەر ئاستێ نێڤدەولەتی کار ا سەر بکەن و پشتەڤان بن کو ئەڤ جۆرە فەرمان و جینۆساید دووبارە نەبنە ڤە".



نوونەرێ کوردێن ئێزدی وسەرۆکێ دەستەیا بلندا بنگەھێ لالش کۆنسلا وەلاتێ ئیتالیا ب ئارمێ لالش خەلاتکر ،وەک رێزگرتن بۆ وان ھاریکاریێن بەردەوام یێن پێشکێشی کوردستانێ ب گشتی و ئێزدیان ب تایبەتی ھاتێنە کرن.
bas news-