حكومەتی سووریا داوای "ئەمانەت"ەكەی لە پەیەدە دەكاتەوە
دوای كۆنترۆڵكردنی شاری حەلەب لەلایەن سوپای سووریاوە، ئێستا هەڵوێستی حكومەتی سووریا بە تەواوی گۆڕاوە، جگە لەوەی ئەمە بە سەركەوتنێكی مێژوویی وەسف دەكات، بە سەرەتایەكیشی دەزانێ بۆ یەكلاكردنەوەی قەیرانی سووریا.
عەمید هەیسەم حەسون، یەكێك لە ئەفسەرانی سوپای سووریا كە لە كۆشكی كۆماری نزیكە بە (رووداو)ی راگەیاند، لە سەرەتای قەیرانی سووریادا لە چوارچێوەی پلانی دەوڵەت بۆ دروستكردنی لیژنە میللییەكان بۆ رووبەڕووبوونەوەی تیرۆر لە سەرتاسەری سووریا، لە پارێزگای حەسەكە لیژنەی میللی دروستكرا كە ئەركیان پاراستنی ناوچەكانی خۆیان بوو.
ئەو ئەفسەرە هەروەها گوتی، مەبەستی ئەوان لە پێكهێنانی ئەو هێزانە لە حەسەكە ئەوە بوو كە نەهێڵن توركیا داخڵی سنووری سوریا ببێ، لە هەمانكاتیشدا رووبەڕووی گرووپە چەكدارەكانیش ببنەوە، بۆیە لە كۆتایی ساڵی 2011 و سەرەتای 2012 خۆی سەرپەرشتی ناردنی كاروانێكی چەك و تەقەمەنی بۆ هێزەكانی پەیەدە كردووە.
عەمید هەیسەم گوتی "ئێستا ساڵح موسلیم دەیەوێ چاكەی ئێمە لە بیری خۆی بباتەوە، جگە لە لێدوانی سەرۆك ئەسەد و وەزیری دەرەوە لەبارەی پێشكەشكردنی هاوكاریی سەربازی بۆ یەپەگە كە ئەو كاتە لیژنە میللییەكان بوون، بە دەستی خۆم چەك و تەقەمەنیم بۆ ناردوون".
ماوەیەكی زۆر هەماهەنگی لە نێوان حكومەتی سووریا و پەیەدە بێ كێشە بوو. بەڵام پاش هێرشی داعش بۆ سەر كۆبانی، پەیوەندیی سەربازی لەنێوان یەپەگە و ئەمریكا دامەزرا و ئەمەش ناڕەزایەتی حكومەتی سووریای لێكەوتەوە. بەرپرسانی سووری چەند جارێك نیگەرانیی خۆیان بە بەرپرسانی پەیەدە راگەیاندووە و داوایان لێكردوون پەیوەندییەكانیان لەگەڵ ئەمریكا بپچرێنن.
عەمید هەیسەم حەسون دەڵێت "لەوەتای پەیەدە بووەتە بەكرێگیراوی ئەمریكا و لە هەندێك شەڕ بۆ پاراستنی بەرژەوەندیی ئەمریكا بەكاردەهێنرێ، حكومەت هەستی بە نامەردیی پەیەدە كردووە كە دەیەوێ غەدر لە دەوڵەت بكات و لەسەر حیسابی دەوڵەت نفووزی خۆی بەهێز بكات".
بە گوتەی ئەو ئەفسەرەی سوپای سووریا، جارێ حكومەتی سووریا هیچ كاردانەوەیەكی بەرامبەر پەیەدە نابێ، چونكە ئێستا بە شەڕی ئۆپۆزیسیۆنەوە سەرقاڵە، بەڵام دەڵێت "لە كۆتاییدا پەیەدە بە خۆشی بێت یان بە ناخۆشی دەبێت بگەڕێنەوە ژێر ركێفی دەوڵەت". گوتیشی "ئەوان پێشتر بە رێككەوتن لەگەڵ حكومەتی سووریا لە چەند ناوچەیەك جێگیركراون، بەڵام ئەوان ئیستیغلالی ئەو بۆشاییەیان لە باكووری سووریا كرد كە بەهۆی شەڕی دەوڵەتەوە لەگەڵ گرووپە چەكدارەكان دروستبوو.
گەڕانەوە بۆ رۆژئاوای كوردستان
دوای گواستنەوەی چەكدارانی ئۆپۆزیسیۆن و هاووڵاتیانی سڤیل لە حەلەب، ئێستا دەنگۆی گەڕانەوەی رژێمی سووریا بۆ رۆژئاوای كوردستان گەرمە كە پەیەدە سێ كانتۆنی تێدا راگەیاندووە و لەلایەن ئەنجوومەنێك بەناوی تەڤگەری دیموكراتی (تەڤدەم) بەڕێوەدەبرێ.
عەمید هەیسەم حەسوون كە بە گوتەی خۆی ئاگای لە پلانەكانی داهاتووی حكومەتی سووریایە، دەڵێت "ئەو ناوچانە بە ئەمانەت لەلای پەیەدە بوون، ئێستا دەوڵەت دەیەوێ ئەو ئەمانەتە وەربگرێتەوە، ئەركی ئەوان وەكو رووبەڕووبوونەوەی تیرۆریستان كۆتایی هات". بەڵام كاتی گەڕانەوەی رژێمی بۆ ئەو ناوچانە ئاشكرا نەكرد.
ئێستا هەموو شاری حەلەب جگە لە گەڕەكی شێخ مەقسود و شەش گەڕەكی دیكە، لە ژێر دەستی حكومەتی سووریادان. سەبارەت بەو ناوچانەی لە حەلەب لەژێر كۆنتڕۆڵی یەپەگەدان. عەمید هەیسەم حەسون دەڵێ "یەپەگە لە حەلەب دەیەوێت بۆ دەوڵەتی سووریا پێشان بدات كە ئەوان وەفادار بوون و لەگەڵ سوپای سووریا شەڕی گرووپە چەكدارەكانی كردووە، بەڵام ئەمە ئەوە ناگەیەنێ ئەو گەڕەكانە لەژێر دەستی ئەوان بمێنن. بۆیە داوای لێكراوە یەكسەر بێنە پاڵ دەوڵەت و دەزگاكانی دەوڵەت لەو گەڕەكانە چالاك بكرێنەوە".
هەتاوەكو ئێستا پەیەدە هیچ هەڵوێستێكی لەبارەی هۆشدارییەكانی بەرپرسانی دەوڵەتی سووریا بۆ چۆڵكردنی گەڕەكەكانی حەلەب و ناوچەكانی دیكەی رۆژئاوای كوردستان دەرنەبڕیوە، بەڵام بەپێی ئەو دیمەنانەی ئەو ناوچانەی یەپەگەی لێیە لە حەلەب، ئاڵای یەپەگە و سووریا هەڵدراون و سەربازانی سووریاش لەو گەڕەكانە دەبینرێن.
ئێستا رووسیا بووەتە نێوەندكار لە نێوان پەیەدە و حكومەتی سووریا، بەڵام حكومەتی سووریا رەتیدەكاتەوە كانتۆن، یان بەڕێوەبەرایەتی خۆسەر لە رۆژئاوای كوردستان ئاوا بكرێ، ئەفسەرەكەی سوپای سووریا دەڵێت "ئێستا حكومەتی سووریا لە هەموو كاتێك بەهێزترە، لەسەر حسابی سەروەریی وڵات، هیچ جۆرە سازشێك بۆ پەیەدە ناكات كە لە سەرەتاوە ئەركی تەنیا رێگریكردن لە گرووپە چەكدارەكان و پاراستنی سنووری باكووری رۆژهەڵاتی سووریا".
پەیەدە داوای دانیشتن دەكات
هەفتەی رابردوو، توركیا، رووسیا و ئێران رێككەوتنێكی هەشت خاڵییان پەسەند كرد. بۆیە دوای ئەم رێككەوتنە بەرپرسانی پەیەدە بۆ یەكەمجار داوای دانیشتنیان لە ئەنجوومەنی نیشتیمانی كورد لە سووریا كە ئێستا ژمارەیەك لە سەركردەكانی لە زیندانەكانی ئەو حیزبەدان.
رووداو
