بەرپرسی لقی پارتی دیموکراتی کوردستان له خانەقین ئاشکرایکرد، گروپێک لە ناوچەکە بەناوی داعش ھەڕەشەی لە خاوەن کارگەکانی ناوچەکە کردووە گەر ھەر یەکێک لەوانە ١٠ھەزار دۆلاریان پێنەدات خاوەنەکانیان دەکوژن و کارگەکانیشیان دەسووتێنن، ئەوانیش پێشمەرگەیان ئاگادار کردۆتەوە.



"شێخ جەعفەر شێخ مستەفا" بە ئاژانسی ھەواڵی زاگرۆسی راگەیاند: "لە سنوری جەلەولا و قەرەتەپە شەوی رابردوو گروپێک بەناوی تیرۆرستانی داعشەوە ئاگاداریەکیان داوەتە کارگەکانی بلۆک و غەسالە و ئەوانە ھەڕەشەی ئەوەیان لێکردوونە گەر ھەر یەکە لەوانە ١٠ھەزار دۆلار نەدات بە ئەوان خاوەن کارگەکان دەکوژن و کارگەکانیشیان دەسووتێنن.



شێخ جەعفەر شێخ مستەفا گوتی: خاوەن ئەو کارگانەش ھاتوونەتە لای ھێزی پێشمەرگە سکاڵایان کردووە و ھێزێکی پێشمەرگەش لە لیوای سێ چۆتە ناوچەکە بۆ ئەوەی پارێزگاریان لێ بکات.



وتیشی، ئەو گروپە ھەر عەرەبی ناوچەکەن و لەگەڵ داعشدان و شەوانە کە تاریک دادێت دەچنە گوندەکان و ئەو ھەڕەشەیە دەکەن، لەبەر ئەوەی داعش خۆ لە موسڵ و ناوچەکانی خۆی نایەت لەو ناوچانە ھەڕەشە لە خەڵکی بکات.



شێخ مستەفا باسی لەوەشکرد، ئەو گروپەی پێشتریش کە شەوانە بە ماتۆرسیکل دەھاتنە ناوچەکە و کردەوەی تیرۆرستیان ئەنجام دەدا و تاوەکو ئێستا ماون و دەستگیرنەکراون.
payamner-