ئەندامەکێ مەکتەبێ سیاسییا پارتی دیموکراتی کوردستانی راگەھاند، ژکارکەفتنا پەرلەمانێ کوردستانێ د ماوێ بۆری دا بوویە ئەگەر کو قەیرانا سیاسی پەیداببیت و قوولتر لێ بھێت و گۆت: ھەکە پەرلەمان کارا ببیت، دێ بیتە رێخۆشکەرەکێ مەزن بۆ چارەسەرکرنا قەیرانێن سیاسی.

جەعفەر ئێمینکی د داخۆیانیەکا تایبەتدا دیار کر، پشتی ھەموو لیژنێن پارتێن سیاسی گفتۆگۆیێ ل گەل ئێکدو دکەن دێ قۆناغا سیێ دەست پێ کەت و فۆرمەلە دێ ھێتە کرن و ئەڤ فۆرمەلە دێ بیتە بنەما بۆ چارەسەرکرنا قەیرانا سیاسی و گۆتیشی: مە نھا قەیرانا دارایی و سیاسی ل ھەرێمێ ھەیە، قەیرانا سیاسی ئەوە کو پەرلەمان یێ ژ کارکەفتی و ئەڤە گرفتا سەرەکی یە، چونکو تێکچوونا پەیوەندیێن سیاسی دناڤبەرا پارتاندا ل ھەموو وەلاتان ھەیە، بەلێ ھەر دەمێ تێکچوونا وان پەیوەندیان دەزگەھێ پەرلەمانی ژکار ئێخست، بێگومان دێ قەیرانا سیاسی پەیدا بیت.

ئێمینکی ئاماژە دا وێ چەندێ، ھەکە پەرلەمان کارا ببیت، دێ کارتێکرنا قەیرانا سیاسی ل سەر ھاوولاتیان کێمتر لێ ھێن و نھا حکوومەتێ گەلەک پێدڤی ب پەرلەمانی ھەیە. ھەکە ئەم گرفتێن خۆ بچووک بکەین و مەزنتر لێ نەکەین، دێ بیتە ھاریکاریەک گرفت زووتر چارەسەر ببن، چونکو ھەتا نوکە ژی ھندەک لایەن ل شوونا چارەسەریێ، گرفتا چێ دکەن و مەزنتر ژی لێ دکەن.











باسنيوز