سەرۆکی حکوومەتی هەرێمی کوردستان رایدەگەیەنێت، کە پێویستە پەیوەندییەکانی هەولێر و بەغدا بەشێوەیەکی دیکە دابڕێژرێنەوە، چونکە ”ناتوانین بەشێوەی رابردوو بەردەوام بین“.

نێچیرڤان بارزانی، سەرۆکی حکوومەتی هەرێمی کورستان لە چاوپێکەوتنێکی ماڵپەڕی (ئەلمۆنیتۆر)دا رایگەیاندووە، کە میدیاکانی کۆماری ئیسلامیی ئێران دژایەتیی پرسی سەربەخۆیی کوردستانی باشوور دەکەن و گفتوگۆ لەگەڵ ئەو وڵاتەش لەبارەی سەربەخۆییەوە بە پێویست دەزانێت، بەڵام ”وا دیارە پێش ئەوەی دانیشین و لەبارەی ئەو بابەتەوە قسە بکەین، ئەوان بڕیاری خۆیان داوە و دژی سەربەخۆیین“.

نێچیرڤان بارزانی لە بەشێکی دیکەی چاوپێکەوتنەکە باسی بوونی چەکدارانی سەر بە پارتی کرێکارانی کوردستان (پەکەکە)ی لە شاری شنگال کردووە و رایگەیاندووە، هەرچەندە یەکینەکانی پاراستنی گەل (یەپەگە) ”رۆڵێکی بەرچاو“یان لە یارمەتیدانی خەڵکی ناوچەکە هەبوو و ”پێزانینمان بۆ ئەو کارەی ئەوان ھەیە“، بەڵام لەم کاتەدا و مانەوەی چەکدارانی سەر بە پەکەکە تەنها ”ناسەقامگیری“ دروست دەکات، رێگا لە گەڕانەوەی هاووڵاتییان دەگرێت، گوتیشی: "خەڵکی لە دووبارە ڕوودانی شەڕ و پێکدادان دەترسن یان نیگەرانن کە ئایندەیەکی نادیار چاوەڕوانیان دەکات و ئێمەش نیگەرانییەکانیان ڕادەگەیەنین" بۆیە ”پێویستە پەکەکە ناوچەی شنگال بەجێ بھێڵێت“.

هەروەک سەرۆکی حکوومەتی هەرێمی کوردستان رایگەیاندووە، سەربەخۆبوونی کوردستانی باشوور و دروستبوونی دەوڵەتی کوردستان رێژەی سەقامگیریی لە رۆژهەڵاتی ناوەڕاست زیاتر دەکات، هاوکات بە پێویستیشی دەزانێت جۆرێکی دیکەی پەیوەندیی لە نیوان حکوومەتی هەرێمی کوردستان و عێراق دروست بکرێت، چونکە ”ناتوانین بە شێوازی رابردوو لەگەڵ بەغدا بەردەوام بین“.

نێچیرڤان بارزانی لەبارەی هەڵوێستی تورکیا لەسەر پرسی سەربەخۆیی کوردستان پێیوایە چیتر ئەو پرسە بۆ تورکیا هێڵی سوور نییە و ناردنی بۆری گواستنەوەی نەوتی کوردستانیش بەسەر خاکی تورکیا بۆ سەر دەریا، بە نموونەی جۆرێک لە رەزامەندیی تورکیا بە سەربەخۆیی کوردستان دادەنێت.












باسنيوز