سەرۆکایەتیی زانکۆی ڕاپەڕین خوازیارانی خوێندن لە زانکۆکانی ئەورووپا ئاگادار دەکاتەوە، کە دەتوانن لەسەرەتای مانگی داھاتووەوە داواکاری پێشکەش بکەن.

ئاراز ڕەمەزان، لێپرسراوی ڕاگەیاندن و پەیوەندییەکانی زانکۆی ڕاپەڕین بە (باسنیوز)ی ڕاگەیاند: "قوتابییانی قۆناغەکانی (دوو، سێ و چوار)ی زانکۆ و مامۆستایان و فەرمانبەران، بۆ خوێندن لە یەکێک لە زانکۆ ئەورووپییەکان لەسەر خەرجی یەکێتیی ئەورووپا و لە چوارچێوەی پڕۆژەی ئیراسمۆس کە زانکۆکەمان ماوەی سێ ساڵە بەشدارە تێیدا، دەتوانن فۆڕمی داواکاری پێشکەش بکەن".

گوتیشی: "ھەروەک قوتابییانی قۆناغی چوارەمی سەرجەم بەشەکانی زانکۆش دەتوانن داواکاری خوێندنی ماستەر پێشکەش بکەن".

ئاماژەی بەوەش کرد، کە لەسەرەتای مانگ 1ی ساڵی 2017دا، بەڕێوەبەرایەتیی پەیوەندییەکان و ڕاگەیاندن و چاپەمەنییەکانی زانکۆی ڕاپەڕین چەند سیمینارێک دەربارەی چۆنیەتی پێشکەشکردنی داواکاری بۆ پڕۆژەی (ئیراسمۆس مەرحەبا) ڕێک دەخات و سەرجەم زانیارییەکانی پڕۆژەکەش بە زمانی کوردی و ئینگلیزی بڵاو دەکەینەوە.

ئەو بەرپرسەی زانکۆی راپەڕین ھێمای بۆ ئەوە کرد، کە بۆ پڕکردنەوەی فۆڕم، خوازیاران دەتوانن سوود لەو بەستەرە ببینن:
http://www.usc.es/marhaba/application/index.php ، ھەروەک بۆ وەرگرتنی زانیاریی زیاتر دەربارەی پڕۆژەکە دەتوانن سوود لەو بەستەرانە ببینن:
BAS NEWS-